«Mańǵystaýlyq munaıshylar mámilege kelmeı otyr» - respýblıkalyq basylymdarǵa sholý

***

«Egemen Qazaqstan» gazetiniń búgingi nómirinde Memleket basshysy N.Nazarbaevtyń Ókimimen birqatar taǵaıyndaýlar bolǵandyǵy jazylǵan. Atap aıtqanda, Sáken Ádilhanuly Jasuzaqov Qazaqstan Respýblıkasy Qorǵanys mınıstriniń birinshi orynbasary - Shtab bastyqtary komıtetiniń tóraǵasy qyzmetine; Talǵat Jeńisuly Janjúmenov Qazaqstan Respýblıkasy Qorǵanys mınıstriniń orynbasary qyzmetine; Murat Jáleluly Maıkeev Qazaqstan Respýblıkasynyń Qarýly Kúshteri Qurlyq áskerleriniń bas qolbasshysy qyzmetine; Músilim Muhtaruly Altynbaev «Astana» óńirlik qolbasshylyǵy áskerleriniń qolbasshysy qyzmetine; Vasılıı Nesipqazyuly Rysbaev «Shyǵys» óńirlik qolbasshylyǵy áskerleriniń qolbasshysy qyzmetine taǵaıyndaldy.

Keshe elordada Memlekettik hatshy - Syrtqy ister mınıstri Qanat Saýdabaevtyń qatysýymen Eýropadaǵy Qaýipsizdik jáne yntymaqtastyq uıymyna tóraǵalyq etý máseleleri jónindegi memlekettik komıssııanyń ekinshi otyrysy ótti. Osyǵan oraı «Egemen Qazaqstan» gazetinde «Saıası elıta úlken úmit kútedi» degen taqyryppen maqala jaryq kórdi. Jarııalanymda EQYU aldynda turǵan máseleler kúrdeli ári uzaq merzimdi sıpatqa ıe, sol sebepti Uıymnyń jańasha túrlenip, ózgeshe jandanýy úshin Qazaqstan tarapynan úlken jumystar atqarylýy tıis ekendigi aıtyla kelip, «Bul turǵyda bizdiń seriktesterimiz Uıymdy búgingi kúnniń shyndyǵyna sáıkes beıimdeıtin jáne qaýip-qaterlerdiń aldyn alýǵa múmkindik beretin EQYU sammıtin ótkizý týraly Elbasy bastamasyn kókeıkesti ári ýaqtyly qabyldanǵan sheshim retine baǵalaýda. Sol sebepti atalǵan sammıttiń ótkizilýi Qazaqstannyń halyqaralyq sahnadaǵy bedelin eseleı túspek», degen Q.Saýdabaevtyń sózi keltirilgen.

Osy keńeske toqtalǵan «Aıqyn» gazeti «Elbasy Nursultan Nazarbaevtyń bastamasymen EQYU-nyń kezekti sammıtin Qazaqstan táýelsizdiginiń 20 jyldyǵy qarsańynda ótkizý josparlanǵan. Osy oraıda bul is-sharanyń mańyzy zor», dep jazady.

Sondaı-aq «Ekspress K», «Lıter» basylymdarynan da Eýropadaǵy Qaýipsizdik jáne yntymaqtastyq uıymyna tóraǵalyq etý máseleleri jónindegi memlekettik komıssııanyń ekinshi otyrysyna qatysty maqalalar legimen tanys bola alasyzdar.

«Tallınn qalasynda ekonomıkalyq jáne ǵylymı-tehnıkalyq yntymaqtastyq jónindegi Qazaqstan-Estonııa úkimetaralyq komıssııasynyń birinshi otyrysy ótti. Atalǵan komıssııa 2009 jylǵy 7 qyrkúıekte Estonııa Premer-mınıstri Andrýs Ansıptiń Qazaqstanǵa resmı sapary barysynda qol qoıylǵan kelisimge sáıkes qurylǵan», dep jazady «Egemen Qazaqstan» gazeti. Basylymnyń habarlaýynsha, komıssııa otyrysy barysynda ekijaqty árekettestik máseleleri, sonyń ishinde kólik jáne tranzıt, energetıka, aqparattyq tehnologııalar, týrızm, aýyl sharýashylyǵy, bilim berý, ǵylymı zertteýler, mádenıet, densaýlyq saqtaý sekildi máseleler talqylanǵan.

Osy basylymda jaryq kórgen Qorǵanbek Amanjoldyń «Іzdenimpazdyq pen yjdaǵat shoqantanýdaǵy shoqtyǵy bıik eńbekti dúnıege keltirdi» atty maqalasyna belgili jazýshy Jarylqap Beısenbaıulynyń «Shoqan» atty derekti ǵumyrnamalyq hıkaıaty arqaý bolǵan. «Osy rette bir jarym ǵasyr buryn uly ǵalym arman etken, azattyqqa jetken jańa zamannyń Shoqan haqyndaǵy jańa sózin Jarylqap Beısenbaıuly aıtqan eken degen paıym-pikirge toqtaǵanymyz da ras», deıdi maqala avtory.

***

«Aıqyn» gazetiniń dástúrli «Aq sóıle!» aıdarynyń búgingi qonaǵy - Mádenıet jáne aqparat mınıstrligi Aqparat jáne muraǵat komıtetiniń tóraǵasy Baýyrjan Omarov. «Aıtys - básekege qabiletti óner» degen taqyryppen berilgen ekeýara áńgimeniń tolyq nusqasyn basylymnyń juma kúngi nómirinen egjeı-tegjeıli oqı alasyzdar.

Naýryz aıynyń basynda bastalǵan jańaózendik munaıshylardyń ereýili basylmaı turǵanyn jazǵan «Aıqyn» gazetiniń habarlaýynsha, sońǵy birneshe kúnnen beri jumysyn toqtatqan «QazMunaıgaz» Barlaý- óndirýge qarasty «Ózenmunaıgaz» óndiristik fılıalynyń 8 myńdaı jumysshysynyń áreketin Jańaózen qalalyq soty zańsyz dep tapqanmen, ereýilshilerdiń taraıtyn túri kórinbeıdi. Munaıshylardyń narazylyǵy arqaý bolǵan maqala «Mańǵystaýlyq munaıshylar mámilege kelmeı otyr» degen taqyryppen jarııalandy.

Atalǵan jaıt «Egemen Qazaqstan» gazetiniń de nazarynan tys qalmaǵan. Oqıǵaǵa oraı basylym tilshisi kompanııa basshysy Kenjebek Ybyrashovpen suhbattasqan. «Ereýilshilerdiń oılaǵandary ne?» degen taqyryppen berilgen maqaladan munaıshylar ereýiline qatysty kompanııa basshysynyń pikirin oqı alasyzdar.

***

«Semeı halqynyń teń jartysy osymen úshinshi kún qatarynan qarańǵyny qarmanyp otyr. Ásirese, qalanyń shyǵys bóligindegi keıbir úıler, soǵan qosa, Stepnoı, Tsementshiler kenti jáne Jańa qurylys aýdandary jaryqtan qaǵyldy. Esh eskertýsiz jasalǵan bul shekteýler emdeý mekemeleriniń jumysyna kedergi keltirip, kesirin tıgizdi. Naqtyraq aıtsaq, № 2 qalalyq perzenthanadaǵy úsh sábıdiń taǵdyry qyl ústinde tur. Olardyń biri tunshyǵyp týsa, ekeýi aıy-kúni jetpeı ómir esigin ashqan. Nárestelerdiń ósip-jetilýi úshin ınkýbator atalatyn qurylǵy árdaıym tokqa qosylyp turýy kerek. Qurylǵy ishindegi temperatýra 30-35 gradýstan tómen bolmaýy tıis eken. Qazir arnaıy rejımniń saqtalmaýynan sábılerdiń jaǵdaıy kúrt aýyrlap ketti», dep jazady «Alash aınasy» gazeti. Osy taqyryp keńinen tarqatyla jazylǵan maqala basylymnyń búgingi sanynda «Jas analar maısham jaryǵymen bosanyp jatyr» degen taqyryppen basylǵan.

Keshe Almatydaǵy Qazaqstan strategııalyq zertteýler ınstıtýtynda «Qoja Ahmet Iasaýıdiń murasy jáne qazirgi zamanǵy ıslam» taqyrybynda ǵylymı-tájirıbelik konferentsııa bolyp ótti. Oǵan elimizdiń aımaqtarynan Qoja Ahmet Isaýıdiń murasyn zerttep júrgen ǵalymdar men mádenı qaıratkerler jınaldy. Alqaly jıyn arqaý bolǵan maqala «Alash aınasy» gazetinde «Qazaq ıdeologııasynyń negizgi dińgegi - Iasaýı murasy nemese memleket damýynyń tórt qaǵıdasy qandaı?» degen taqyryppen berildi. «Qazaqstannyń ulttyq ıdeologııa máselesi jaıynda árqıly pikirler aıtylyp júr. Sheteldik, otandyq sarapshylar, keıde tipti ózimizdiń zııaly qaýym ókilderi de «Qazaqstanda ıdeologııa joq» degendi aıtyp qalady. Alaıda ıdeologııasyz halyq bolmaıdy», dep jazady basylym. Egjeı-tegjeıli jazylǵan maqalany basylymnyń ekinshi betinen oqı alasyzdar.

«Jerar Deparde «osyndaı myqty akterlaryńyzben nashar kıno túsirýge qaqylaryńyz joq» dep ketti», deıdi «Alash aınasy» gazetiniń tilshisine bergen suhbatynda belgili akter Nurjuman Yqtymbaev. Tanymal aktermen arada órbigen suhbat bsylymnyń «Dat» aıdarynda berilgen. Onda ol atalǵan frantsýz akterimen kınoǵa túsip jatqandyǵyn sóz etip, elimizdegi kıno salasyna qatysty ózekti máselelerdi ortaǵa salǵan.

***

«Qaraǵandylyq Ekaterına Aıdova Germanııanyń Berlın qalasynda ótken jasóspirimder arasyndaǵy konkımen júgirý sporty boıynsha Álem kýbogynda absolıýtti jeńimpaz atandy», dep jazady «Kazahstanskaıa pravda» gazeti. Halyqaralyq jarystyń tórt kezeńinde de qazaqstandyq sportshynyń mereıi ústem bolǵan.