Mańǵystaýlyq mektep túlekteri ulttyq biryńǵaı testileýdi kompıýtermen tapsyrady
Basqarma basshysy Svetlana Tólebaevanyń málimetinshe, bıyl oblys túlekteriniń barlyǵy UBT tapsyrýǵa nıetti. Bıyl UBT ótkizýde birneshe ózgeris engizildi. Bul týraly Mańǵystaý oblysynyń qoǵamdyq kommýnıkatsııa ortalynda ótken brıfıngte Oblystyq bilim basqarmasynyń basshysy Svetlana Tólebaeva málim etti. Onyń aıtýynsha memlekettik grantqa túsý úshin UBT mamyrda bastalyp, 30 maýsymǵa deıin jalǵasady. Ótinishti http://app.testcenter.kz/ saıty arqyly berýge bolady.
«Kompıýterlik testileýdiń bir artyqshylyǵy – UBT nátıjelerin testileý aıaqtalǵannan keıin birden bilýge bolady. Sondaı-aq UBT qatysýshysy qandaı suraqtarǵa qate jaýap bergenin birden kóre alady. Talapkerlerge yńǵaıly bolý úshin UBT barysynda kompıýter ekranynda kalkýlıator, Mendeleev jáne tuzdardyń erigishtigi kesteleri qoljetimdi bolady. UBT nátıjelerimen kelispegen jaǵdaıda talapker kelesi kúndi kútpeı-aq apellıatsııaǵa ótinish bere alady. Talapkerdiń smartfon, shpargalka jáne t.b. tyıym salynǵan zattardy paıdalanǵany anyqtalsa, testileý avtomatty túrde toqtatylyp testilenýshiniń nátıjesi joıylady»,-dedi Svetlana Tólebaeva.
Ashyqtyq pen obektıvtilikti qamtamasyz etý úshin UBT-ny ótkizý rásimine QR Sybaılas jemqorlyqqa qarsy is-qımyl agenttiginiń Arnaıy monıtorıngtik toby men «Adaldyq alańy» jobalyq keńsesiniń ókilderi shaqyrylady.Akademııalyq adaldyq qaǵıdattarynyń saqtalýyn baqylaýdy kúsheıtýge múmkindik beredi.UBT barysynda barlyq sanıtarlyq-epıdemıologııalyq talap saqtalady. Ata-analar men muǵalimderge UBT ótkizý pýnktiniń aýmaǵynda bolýǵa tyıym salynady. Olar úshin aýdıtorııadan beınetranslıatsııa qamtamasyz etiledi.