Mańǵystaýlyq metsenattar mıllıondaryn qalaı jumsaıdy
Óńirdiń damýyna súbeli úles qosyp júrgen birqatar kásipkerler men erikti azamattarǵa «Jomart júrek» syılyǵy tabystaldy.
Ákimdik taratqan habarlamaǵa qaraǵanda, «Atameken» baǵdarlamasy boıynsha aǵymdaǵy jyly oblysta 39 joba metsenattardyń kómegimen iske asyrylǵan. Atap aıtsaq, aımaq boıynsha 12 sport keshenderi men alańy, 4 mektep janynan jylyjaı, 100 oryndyq otbasylyq jataqhana salynǵan. Sondaı-aq, kásipkerlerdiń arqasynda múmkindigi shekteýli adamdarǵa 11 páter syıǵa berilip, 18 turǵyn úı jóndelgen jáne 4 balalar oıyn alańy boı kótergen. 2018 jyly taǵy jalpy somasy 14 mlrd 785 mln 60 myń teńgege eseptelgen 40 jobany iske asyrý bastaldy. Jyldyń sońyna deıin 22 joba aıaqtalady dep kútilýde.
Metsenattar men kásipkerler bas qosqan jıynda oblys ákimi Eraly Toǵjanov taǵy 29 jobanyń iske asatynyn aıtyp ótti.
«Sizderdiń kómek jáne qoldaýlaryńyzdyń arqasynda, biz 2019-2020 jyldary jalpy somasy 13,5 mlrd teńge bolatyn 29 jobany iske asyrýdy josparlap otyrmyz. Aqtaý qalasynda sport saraıynyń qurylysy, Jańaózende 59 páterdi jóndeý, Beıneýde 160 oryndyq sport keshen qurylysyn salý, Munaıly aýdanynda kitaphana men mádenıet úıiniń qurylysy jáne taǵy basqa qurylystar salý josparlanýda»,-dedi Eraly Toǵjanov.
Atymtaı jomarttarǵa «Jyl metsenaty», «Týǵan ólke», «Jyl tulǵasy», «Úzdik uıym», «Eren eriktiligi» atalymdary boıynsha syılyqtar tapsyryldy.
Sonymen, «Jyl metsenaty» nomınatsııasy boıynsha Esengeldın Saken Esengeldiuly jáne Kerelbaev Asqarbek Saıynuly marapattaldy.
«Týǵan ólke» syılyǵy Lesbaev Muhat Berdibekuly, Tabyldıev Dúısebaı Amanhanuly jáne Muńalbaev Suńǵat Ańshybaıulyna tabystaldy. Belsendi azamattyq ustanymy, ártúrli baǵyttaǵy keń aýqymdy qaıyrymdylyq qyzmetti júzege asyrǵany úshin «Jyl tulǵasy» nomınatsııasyn Shakenova Dametken Asabaıqyzy, Bımyrzaev Isa Ibraıymuly jáne Órisbaev Abbat Jáńgirhanuly ıelendi.
Áleýmettik mańyzy bar jobalardy, qaıyrymdylyq jobalardy iske asyrýda bas demeýshlik jasaǵany úshin «Úzdik uıym» nomınatsııasymen Qojanepesov Baqytjan Mátkereıuly, Joldybaev Asylbek Turaruly jáne Ábdirahman Qýanyshbek Spanuly marapattaldy.
Volonterlik qyzmetterge belsendi qatysqany úshin «Eren eriktiligi» nomınatsııasymen Ogaı Antonına Vıacheslavovna, Mýradova Sánim Іzbasarqyzy jáne «Úmmet jastary» qoǵamdyq uıymy marapattaldy. Al «Jyl tulǵasy» ataǵy óńirge tanymal kásipkerlerdiń biri biri - Isa Bımyrzaevqa berildi.
«Jańbyr mol jaýsa, kók shóp kóp shyǵady degendeı. Eger kóp tabys tapsam, jan-jaǵymdarǵa kómek kórsetýge tyrysam. Tapqan tabysym tek jaqsylyqqa buıyrsa eken dep oılaımyn»-deıdi kásipker Isa Bımyrzaev.
