Mańǵystaýlyq kópbalaly analar qoǵamdyq kólikte tegin júredi
Bul týraly búgin oblys ákiminiń halyqqa esep berý kezdesýinde aıtyldy.
«Ústimizdegi jyldyń sáýir aıynan bastap Aqtaý qalasyndaǵy qoǵamdyq kólikte jáne «Aqtaý - Munaıly aýdany» baǵyty boıynsha aýdanaralyq kólik qatynasynda, tamyzdan bastap Jańaózen qalasynyń qoǵamdyq kólikterinde kópbalaly analar tegin júredi», - dedi óńir basshysy Eraly Toǵjanov.
Aıta keteıik, buǵan deıin Shymkent qalasynyń ákimi Ǵabıdýlla Ábdirahymov naýryz aıynan bastap «Altyn alqa» jáne «Kúmis alqa» ıegerleri men Batyr analardyń avtobýsta tegin júretinin aıtqan bolatyn.
Sondaı-aq, bıylǵy jyldyń ekinshi toqsanynan bastap mańǵystaýlyq kópbalaly, az qamtylǵan otbasylarǵa 100 myń teńge kóleminde birjolǵy tólem beriletin boldy. Odan bólek, mańǵystaýlyqtar qaıtarymsyz granttar ala alady.
«Bıyl múgedekterge, jetim balalarǵa jáne kópbalaly, az qamtylǵan otbasylarǵa óz bıznesin ashý úshin konkýrstyq negizde 500 myń teńgege deıin granttar bere bastaımyz», - dedi óńir ákimi.
