Mańǵystaýlyq keıýana umyt qalǵan ónerdi qaıta jańǵyrtyp júr

AQTAÝ. QazAqparat - Búginde umytylyp bara jatqan kıiz basý ónerin jańǵyrtyp, urpaqqa dáriptep kele jatkan Márýa anamyzdyń eńbegi eren. Jetpisti alqymdaǵan ana qoly qalt etse jún tútip, kıiz basady, dep habarlaıdy QazAqparat tilshisi.

Márýa Ájibaeva – qazaqtyń «kúpi kıgen» ulttyq ónerin zamanaýı naqyshqa keltirip, kópke dáriptep júr. Keıýana Beıneý aýdany, Sarǵa aýylynyń turǵyny. Qolóner sheberi 1949 jyly dúnıege kelgen. Atyraý medıtsına kolledjin támamdap, óz aýylyndaǵy dárigerlik ambýlatorııada uzaq jyldar qyzmet etti. Búginde 10 balany ósirgen «Batyr ana» óz sheshesinen kórgen ónegesin órimdep, kıiz basyp otyr.

«Buryndary basylǵan kıiz uzatylǵan qyzdarǵa da beriletin edi. Qazir azaıyp barady. Bul tekemetti astyndaǵy qoıdyń kúzem júninen (kúzde qyrqylǵan qoıdyń júni) jasaıdy. Sol júndi sabap, sosyn qoıdyń jabaǵy júnin boıap betine salady. Odan keıin shıge orap, ystyq sý quıyp tartady. Shıde pisip shyqsa basýy jeńil bolady. Eki jaǵyn qaıyryp tigedi, sosyn óńdep jaıyp qoıady. Bir eki tósep, qaıta pisirip óńdeıdi. Sonymen ádemi bolyp shyǵady»- , dep jasalý jolymen de bólisti.

Burynǵy ata-babamyzdan kele jatqan óner, qazir umytylyp bara jatyr. Jas kezimizde Turysh, Aqjigit aýyldarynda jasaıtyn adamdar kóp edi degen ókinishin de jasyrmady.

«Sińlilerimmen birge kúnine bir kıiz basatyn edik. Qazirgi tańda zeınettemin. Qolym bos ýaqytta aptasyna bir kıiz basamyn. Tapsyrys qabyldaısyz ba dep kelýshiler bar, biraq meniń oǵan densaýlyǵym jaramaıdy, jasymyz da úlkeıdi. Nemerelerim ósip keledi solar kórsin, úırensin dep jasaımyn», -deıdi Márýa apa.