Mańǵystaýlyq kedenshiler Túrkııadan kelgen kontrabandalyq iri júkti anyqtady

AQTAÝ. QazAqparat - «Quryq» keden beketiniń qyzmetkerleri Mańǵystaý kólik prokýratýrasymen birlesip, Eýrazııalyq ekonomıkalyq odaq shekarasy arqyly iri kólemde kontrabandalyq taýar alyp ótý faktisin anyqtady, dep habarlaıdy QazAqparat tilshisi.

Mańǵystaý oblystyq Memlekettik kirister departamenti baspasóz qyzmetiniń málimetinshe, kontrabandalyq júk tıelgen eki aýyr júk kóligi Túrkııadan «Quryq» teńiz portyna keldi. Taýarǵa ilespe qujattarǵa sáıkes, taýardy túrik óndirýshileri Ózbekstan men Qyrǵyzstan azamattarynyń atyna jibergen.

«Selektıvti baqylaý jáne táýekelderdi basqarý júıesiniń kómegimen, sondaı-aq iri gabarıtti júkter men kólik quraldarynyń ishindegisiniń beınesin alý jáne taldaý úshin ıondalǵan sáýle shashatyn tehnıkalyq quraldyń kómegimen alynǵan tekseris nátıjesinen keıin, tasymaldanyp bara jatqan júkti kedendik qosymsha tekserý sheshimi qabyldandy. Onyń barysynda qujatta kórsetilgen taýardan bólek, halyq tutynatyn ózge de taýarlar bary belgili boldy», - delingen vedomstvonyń baspasóz qyzmeti taratqan aqparatta.

Aldyn ala málimet boıynsha, kontrabandalyq jolmen jetkizilmek bolǵan taýardyń sany júzden astam júk orynyn quraıdy. Materıaldar Mańǵystaý oblysy boıynsha Ekonomıkalyq tergeý departamentine protsessýaldyq sheshim qabyldaý úshin joldandy.