Mańǵystaýlyq kásipkerler aýdan ortalyǵyna jańa sport keshenin salyp berdi
ASTANA. QazAqparat - Qazaqstan Respýblıkasy Táýelsizdiginiń 25 jyldyǵyna oraı Mańǵystaý aýdanynyń Aqshymyraý aýylynda Qaralda balýan atyndaǵy jańa sporttyq keshen paıdalanýǵa berildi, dep habarlaıdy oblys ákiminiń baspasóz qyzmeti.
- Buryn bizdiń voleıbol komandamyz mekteptiń sport zalynda jattyǵatyn edi. Oryn da jetpeıtin. Endi osynda kelip kúnde jattyǵatyn bolamyz, - dedi aýyldyń voleıbol komandasynyń kapıtany Jańalyq Bısembaev.
Jańa nysannyń jalpy kólemi 1 200 sharshy metr. Metsenattar qurylysyna 30 mln teńgeden astam qarajat bóldi. Voleıbol, boks pen qazaqsha kúreske arnalǵan zaldan basqa jattyǵý zaly da qarastyrylǵan. Kıim aýystyratyn jáne jýynatyn bólmeleri bar.
- Mundaı keshen týraly aýyl jastary burynnan aıtyp keledi. Jasóspirimderdiń osy armanyn júzege asyrý úshin «Jańa adym» qoǵamdyq qaıyrymdylyq qory quryldy. Kásipkerlerdiń qoldaýymen jáne aýyl turǵyndarynyń aýyzbirshiliginiń arqasynda Qaralda balýan atyndaǵy zamanaýı sporttyq keshen qurylysyn bastaý týraly biraýyzdan sheshim qabyldandy. Eger taǵy da demeýshiler tabylsa, dzıýdo men sambo sektsııalaryn ashamyz, - dep atap ótti Mańǵystaý aýdanynyń turǵyny Dúısenbek Sádiǵulov.
Qazirgi tańda Mańǵystaý aýdanynda 3 myńnan astam jasóspirim sportpen shuǵyldanady.
