Mańǵystaýlyq kásipkerler «Atameken» palatasynyń qoldaýyna ıe bolyp otyr
2022 jyly óńirlik kásipkerler palatasy shaǵyn jáne mıkrobıznes kásipkerlik sýbektilerin qarjylaı emes qoldaý aıasynda servıstik qyzmetterdiń 4 túri boıynsha óńir kásipkerlerine oflaın jáne onlaın formatta 572 qyzmet kórsetken.
«Jalpy 2022 jyly oblystyq kásipkerlik palatasynyń kásipkerlerge qarjylaı emes qoldaý kórsetý bólimine kóbinese kásipkerler býhgalterlik qyzmetter boıynsha kelgen. Ásirese toqsandyq nemese jyldyq esep kezeńinde júgingen. Qyzmet kórsetý boıynsha bıylǵa júktelgen mindetterdi 89 paıyzǵa oryndadyq. Sondaı-aq aýdandardaǵy fılıaldar da jospardyń údesinen shyǵyp otyr», - deıdi Mańǵystaý oblystyq kásipkerlik palatasynyń kásipkerlerge qajylaı emes qoldaý kórsetý bóliminiń basshysy Rollan Meneev.
Kásipkerler palatasynan tikeleı qoldaý kórgenniń biri - Aqtaý qalasynyń turǵyny Іńkár Júsipova. Ol sulýlyq salonyn ashsam degen armanyn júzege asyrǵan.
«Buryn bıznespen aınalysyp kórgen joqpyn. Sondyqtan kóp izdendim. «Jumyspen qamtý baǵdarlamasy-2021» arqyly oqyp, 580 myń teńge grant utyp aldym. Odan soń mańǵystaý oblystyq «Atameken» kásipkerler palatasyna baryp, jeke kásibimdi ashtym. Erbol Seıilhanov degen maman zańnamalyq talaptardyń durys oryndalýy men eseptik júıeni retteýde kóp kómektesti. Salyq júıesi boıynsha birqatar máseleler boldy. Solardyń oń sheshimin tabýyna yqpal etti», - deıdi ol.
Qazir sulýlyq salonynda 12 adam jumys isteıdi. Onǵa tarta qyzmet túri bar. Ortalyq kúnine 30-40 tutynýshyǵa qyzmet kórsetedi.
Іńkár Júsipova bıznestiń júıeli problemalaryn «Atameken» palatasynyń bilikti mamandarynyń keńesimen sheshe kele, bolashaqta taǵy osyndaı salondar ashýdy josparlap otyr.
Óńirlik kásipkerler palatasynyń kómegimen jeke isin damytqan «V7 grýpp» seriktestiginiń ıesi Erjan Berdeshov Munaıly aýdanynda motor maılaryn jáne motor jıyntyqtaryn satatyn dúken ashsa, Sáýle Jetimekova 10 mln teńge kóleminde mıkrokredıt alyp, kilem jýý ortalyǵynyń jumysyn bastaǵan.
«Atameken» ulttyq kásipkerler palatasy 2021–2025 jyldarǵa arnalǵan kásipkerlikti damytý jónindegi ulttyq jobany ázirledi.
Azamattardy turaqty jumyspen qamtýdy, tabysy kúnkóris deńgeıinen tómen aýyl turǵyndarynyń sanyn azaıtýdy kózdegen joba osylaısha birte-birte óz maqsatyna jetip keledi.
