Mańǵystaýlyq kásipker bıo-aýlany damytyp otyr
Óńirge etene tanys Rýslan Jınkın Ómirzaq aýylynda sańyraýqulaq ósiredi. Ony jertólede jasandy jolmen ósirip, óńirdi óz ónimimen qamtıdy. 4 adamdy eńbekpen qamtyp otyr. Erekshe tásildi meńgergen ómirzaqtyq kásipker munymen shektelip qalǵan joq. Eshki baǵyp, sútin saýady. Nan pisirip, dúkenderge jetkizedi. Bul jobany júzege asyrý úshin memleketten qarjylaı qoldaý alǵan. Qazir isiniń órge basqanyna qaramastan, túrli bıznes ókilderiniń kezdesýleri men kásiptik saýat ashý sharalarynan qalmaıtynyn jetkizdi. Sondyqtan ınvestorlar forýmynan senimdi áriptes pen tyń ádis úırenemin dep kózdeıdi.
«Men eshki sútin satamyn, nan pisiremin. Ony dúkenderge tasmaldaımyn. Myna aptalyqqa tájirıbesi bar mamandar kelip, ınvestıtsııa tartý, qarjylyq esepteý sııaqty aıtyp jatyr. Mysaly, Reseı sharýalarynyń eńbekteri keńinen túsindirildi. Olar da úlken nan pisiretin oryndar bar. Mine, úlken kásibi barlar men kishi orny bar bıznesmender qalaı áriptestik ornata alady. Óte unady»,-deıdi aptalyqqa qatysqan kásipker.
Rýslan Jınkın sańyraýqulaqty qoldan ósirý tásilin alǵash ǵalamtordan kórip, 3 jyl boıy zerttegen. Tıimdiligi men shyǵynyn eseptep, isti bastap ketken. Jertólege sańyraýqulaq ósirý úshin aýa tazartqysh jabdyq ornatylǵan. Ol birkelki ottegi bóledi. Ylǵal 80 paıyzdan aspaý kerek. Ónim kún saıyn erteńgi jáne keshki ýaqytta sýarylady.
«Ónim ekologııalyq taza, óte paıdaly. Jertólede 2 tonna qalyp bar. Odan 800 keli sańyraýqulaq shyǵady», - deıdi ol.
Kásipker bul qala turǵyndary úshin jetkilikti dep pikirin bildirdi.
Sondaı-aq, Rýslan Jınkınniń qorasynda 30 eshkisi bar. Sútti tóldiń ónimin satylymǵa shyǵarady. Emdik qasıeti mol. Sondyqtan suranys ta kóp. Budan bólek eski tehnologııa boıynsha tandyr nan pisirip, táýligine oblys ortalyǵyndaǵy dúkenderge 250-in jetkizedi. Aýyl turǵyny munymen de shektelip qalmaı jylyjaı salýdy josparlap otyr. Shaǵyn ǵana sharýashylyǵyn turǵyndarǵa tamashalaýǵa bolatyndaı etip yńǵaılaǵan.
«Mende týrıstik oryn dep aıtýǵa bolady. Meniń aýlama qyzyǵyp, kórshilerim kele bastady. Keıin kele aýyldastarym da keldi. Sondyqtan oıyma aýlamdy úlken týrıstik orynǵa aınaldyrsam degen oı keldi. Bıo-aýyl degen bar Eýropada. Mine, soǵan qaraı kele jatyrmyn. TMD-da joq sııaqty bıo-aýyl. Biraq qazirgi jaǵdaıymyzdy bıo-aýla desem bolady. Jalpy, Astana qarjy ortalyǵy mamandarynan keńes alýǵa keldim. Múmkin taǵy da sharýa kózderin tabýǵa bolatyn shyǵar»,-deıdi Rýslan Jınkın.
