Mańǵystaýlyq eki oqýshynyń qalaı koronavırýs juqtyrǵany belgili boldy
Keshe Mańǵystaý oblysynda 3 oqýshy men 1 muǵalim koronavırýs juqtyrǵanyn jazǵan bolatynbyz.
Búgin oblystyń qoǵamdyq kommýnıkatsııa ortalyǵynda Mańǵystaý oblysynyń bilim basqarmasynyń basshysy Asqar Seıdalıevtiń qatysýymen brıfıng ótti. Onda mańǵystaýlyq oqýshylar men muǵalimniń qalaı vırýs juqtyrǵany týraly túsinik berildi.
Asqar Seıdalıevtiń aıtýynsha, kezekshi synypta oqıtyn oqýshy qazannyń 8-inen beri mektepke kelmegen. Anyqtalǵandaı, balanyń ájesi «Saryaǵash» shıpajaıynan aýyryp kelgen. Keıin «COVID-19» PTR testin tapsyryp, ol oń nátıje bergen. Bala ájesinen vırýs juqtyrǵan. Qazir otbasynyń barlyq múshesinen synama test alynǵan. Sondaı-aq, 14 qazan kúni 1 synyp oqýshysynan «COVID-19» vırýsyna test alý nátıjesinde onyń vırýs juqtyrǵany anyqtaldy. Belgili bolǵandaı, bala koronavırýstyń sımptomsyz túrimen aýyrǵan.
«Balanyń kóńil-kúıi jaqsy, eki oqýshy da qazir úı-ishimen birge oqshaýlandy. Atalǵan synyp oqýshylary men sabaq bergen úsh pán muǵalimi karantınge jiberildi. Synyp karantınge jabyldy. Sondaı-aq, 14 qazan kúni Munaıly aýdanyndaǵy mekteptiń aǵylshyn tili páni muǵaliminen «COVID-19» ınfektsııasy tabyldy. Bul muǵalim Aqtaý qalasyndaǵy koronovırýs anyqtalǵan oqýshynyń anasy. 7 qazannan beri eńbekke jaramsyz paraqshasyn aldyrǵan. Osy jaǵdaılardy eskere otyryp, shtattyq rejımde kezekshi synyptary bar bilim berý mekemelerine qatań sanıtarlyq-epıdemıologııalyq talaptardy saqtaý basqarmanyń qatań baqylaýynda»,- dedi Mańǵystaý oblystyq bilim basqarmasynyń basshysy Asqar Seıdalıev.
Aıta keteıik, Mańǵystaý oblysynda pandemııa bastalǵaly 43 oqýshy men 23 muǵalim qaýipti indet juqtyrǵan. Qazirgi kezde quzyrly organdar bilim berý uıymdaryna monıtorıng jumystaryn júrgizýde.