Mańǵystaýlyq eki áıelden 7 qap esirtki tárkilendi

AQTAÝ. QazAqparat – Mańǵystaý oblysynda aýyl turǵyndary 90 kelige jýyq esirtkini úıleriniń aýlasyna jasyryp qoıǵan, dep habarlaıdy QazAqparat tilshisi.

​«Kóknar-2019» jedel-aldyn alý sharasy barysynda Mańǵystaý oblysy Polıtsııa departamentiniń Esirtki qylmysyna qarsy kúres basqarmasynyń qyzmetkerleri Atameken aýylynyń buryn sottalǵan eki turǵynyn quryqtady. Olar 39 jáne 44 jastaǵy azamatshalar.

Málim bolǵandaı, 5 qyrkúıek kúni mamandar tintý barysynda qyzmettik Chak atty ıttiń kómegimen úıdiń aýlasynan jerasty jasyryn oryn tapqan. Ol jerden jalpy salmaǵy 88 keli bolatyn jeti úlken qap shyqty. Onyń marıhýana ekeni anyqtaldy.

Atalǵan is boıynsha QR Qylmystyq kodeksiniń 297-baby 2-bóligi (esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý nemese satý) boıynsha sotqa deıingi tergeý júrgizilýde.