Mańǵystaýlyq dızaıner Amerıkada ótken festıvalde jadaǵaıdy álemge tanytty
Mańǵystaýlyq dızaıner Aıjan Rahymbaıqyzy Amerıka Qurama Shtattarynda jyl saıyn uıymdastyrylatyn ár ulttyń mádenı salt-dástúri men ádet-ǵurpyn, qolónerin dáripteıtin «Smithsonian folklife» folklorlyq festıvaline qatysyp, júnnen tigilgen Mańǵystaý jadaǵaıy men ishigin tanystyrdy.
Atalǵan shara 1967 jyldan beri jyl saıyn Vashıngton qalasynda uıymdastyrylady. Festıvalǵa ár jyly AQSh-tyń 50 shtatynan jáne 100-den astam shetelden qonaq keledi.
Aıjan Rahymbaıqyzy festıvalǵa «Mańǵystaý munary» kollektsııasyn aparǵan.
«Kókeıimde júrgen armanym mańǵystaýlyqtardyń ejelgi syrt kıimi - túıe júnnen syrylǵan jadaǵaıdy zamanǵa saı jańǵyrtyp, shetelge tanytý edi. Álemniń alpaýyt eliniń biri AQSh-ta ótetin sharada kórsetý men úshin armanymnyń oryndalǵany boldy», - deıdi Aıjan Rahymbaıqyzy.
Aıjan 2016 jyldan beri qolónermen aınalysady.
«Jadaǵaı - qazaqtyń ejelden kele jatqan syrt kıimi. Ol qazir de ata-ájelerimizden mura bolyp qalyp, keıbir januıalarda saqtalǵan. Er adamnyń jadaǵaıy túıe jún salyp syrylyp, astarlanǵan.
Shı maqpaldan tike túsken bir tigispen syrylyp tigilgen. Biz burynǵy ájelerimiz kıgen jadaǵaıdyń kúmis túımelerin uqsatyp, zergerge tapsyryspen arnaıy jasattyq. Qazaqy kıimniń árbir áshekeıinde halqymyzdyń tarıhynyń, oı-sanasynyń qaıtalanbas kórinisi bar. Ol - bizdiń ulttyq mádenıetimiz. Al ult mádenıetin joǵary deńgeıde kórsetý - jaýapty is» - deıdi ol.
Festıval 11 shildede Ulttyq azııalyq óner murajaıynyń Meyer Auditorium zalynda ótken Qolónershiler odaǵynyń sándik dızaınynyń kórsetilimimen aıaqtalǵan.
