Mańǵystaýlyq daryndy oqýshylar «Baldáýren» oqý-saýyqtyrý ortalyǵyna joldama aldy
AQTAÝ. QazAqparat - Aqtaýda «Asqaq ordam-Astana» atty Prezıdenttik jańa jyldyq shyrshatoıy ótti, dep habarlaıdy Mańǵystaý oblysy ákiminiń baspasóz qyzmeti.
Merekelik sharaǵa oblystaǵy jetim jáne ata-analarynyń qamqorlyǵynsyz qalǵan, az qamtylǵan otbasy balalary men otbasy úlgisindegi balalar aýylynyń tárbıelenýshileri qatysty.
Jańajyldyq shyrshaǵa barlyǵy 9-13 jas aralyǵynda 200 bala jınaldy.
Búldirshinderge arnaıy daıyndalǵan merekelik baǵdarlama kórsetildi. Oǵan teatrdyń ártisteri men Mańǵystaýlyq óner juldyzdary qatysyp, óz ónerlerimen dýmandy merekeniń ajaryn ashty. Balalar úlken shyrshany aınala án aıtyp, bı bılep, Aıaz ata men Aqshaqarǵa óz ónerlerin kórsetti. Beınetaspa arqyly Elbasy Nursultan Nazarbaev qatysýshylardy kele jatqan Jańa jyl merekesimen quttyqtap, olarǵa zor densaýlyq, jańa jetistikter men barlyq armandarynyń oryndalýyn, jaqsy oqyp, sapaly bilim alyp, maqsattaryna jete bilýlerin tiledi.
Oblys ákimi Eraly Toǵjanov: «Sizder - Qazaqstannyń bolashaǵy, táýelsiz eldiń urpaǵysyzdar. Sondyqtan týǵan eldiń laıyqty azamattary bolýy úshin bilimdi bolyp er jetýleriń tıis. Jańa jyl jaqsylyǵymen kelsin!»,-dep óz quttyqtaýyn jetkizdi.
Qazaqstan Respýblıkasynyń Prezıdenti atynan Jańa jylǵa qatysýshy barlyq balalarǵa syrt kıimder (kýrtka), sporttyq kıimder, bas kıimder, qysqy etikter, tátti syılyqtar, uıaly telefon syıǵa tartyldy. Sonymen qatar ár balaǵa tanymdyq kitaptar (úsh tilde) jáne quttyqtaý otkrytkasy berildi.
Sharadan soń balalar qalany serýendeý men meıramhanadaǵy merekelik túski asqa shaqyryldy.
Sondaı-aq, 14 daryndy (respýblıkalyq, oblystyq baıqaýdyń jeńimpaz) oqýshy «Baldáýren» respýblıkalyq oqý-saýyqtyrý ortalyǵynda ótetin jańajyldyq shyrshaǵa joldama aldy.
