Mańǵystaýlyq dárigerler bas mıy isingen sábıdi aman alyp qaldy

AQTAÝ. QazAqparat - Mańǵystaýlyq dárigerler bas mıy isingen sábıdi aman alyp qaldy, dep habarlaıdy QazAqparat tilshisi.

15 qyrkúıek kúni júkti kelinshekte Sovid-19 ınfektsııasynyń asqynýyna baılanysty kesar tiligimen jedel ota jasalyp sábı dúnıege keldi. Ekinshi táýlikte asa aýyr jaǵdaıdaǵy náreste oblystyq balalar aýrýhanasyna aýystyryldy. Naqty dıagnozy mı qan aınalymynyń buzylýy, bas mıynyń isinýi, dıslokatsııalyq sındrom, 2-3 dárejeli koma delingen. Nárestege shuǵyl túrde ota jasalyp, ol sátti ótti.

Qazirgi ýaqytta sábı jansaqtaý bóliminde jatyr. Dárigerlerdiń aıtýynsha, tıisti emnen keıin jaǵdaıy jaqsarady jáne onyń ómirine qaýip tónbeıdi. Dúnıege kelgen qyz balanyń anasy aýyr jaǵdaıda. COVID-19 indetiniń asqynýyna baılanysty ókpesi jasandy jeldetý apparatyna qosylǵan.