Mańǵystaýlyq dárigerler 1,5 keli nárestege ota jasady
AQTAÝ. QazAqparat - Mańǵystaý kardıologııalyq ortalyǵynyń hırýrgteri 1,5 keli salmaqtaǵy sábıdiń ashyq arterııaly ózegine biregeı ota jasady, dep habarlaıdy «QazAqparat» HAA tilshisi.
Anasy egiz qyz bala kútken. Alaıda olar 31 aptasynda týyp qalyp, bir qyz dúnıege kelgennen keıin eki aptadan soń shetinep ketti. Ekinshisine birneshe kún buryn ota jasalyp, aman qaldy.
«Náreste 2 tamyzda 1 keli 450 gramm salmaqpen kardıologııalyq ortalyqtyń jansaqtaý bólimine tústi. Týǵan kezde náreste 1 keli 200 gramm bolyp týdy. Qyz júrek aqaýyna baılanysty salmaqty baıaý jınady. Onyń arterııaly ózegi ashyq bolyp, balanyń damýyna kedergi keltirdi. Sodan jedel ota jasaýǵa týra keldi. Ota soǵyp turǵan júrekke jasalǵandyqtan, óte qaýipti boldy. Ári bala shala týǵan. Ópkesi jetilmegen, álsiz, salmaǵy az - osy jaǵdaılar eleýli qıyndyq týdyrdy. Eger ota jasalmaǵanda, balanyń aman qalýy neǵaıbyl edi. Búgin otadan keıingi 10-shy kúni - balanyń jaǵdaıy jaqsy. Ol otadan keıin 500 gramm qosty. Ósip keledi, tamaq ishedi, jymııady. Aýrýhanaǵa túsken kezde qan quramynda satýratsııa 70% bolǵan, qazir 99%. Eger osylaı jalǵasa berse, sársenbi aýrýhanadan shyǵaramyz. Qan taldaýy jáne barlyq parametr boıynsha náresteniń jaǵdaıy jaqsy», - dedi ortalyqtyń kardıology Ásel Serıakovskaıa.
Kishkentaı qyzdyń esimi Aqnur. Anasy Altynaı Qylyshbaeva, 1992 jyly týǵan. Aqnur otbasynyń tórtinshi balasy.
