Mańǵystaýlyq búldirshinderdiń 97 paıyzy balabaqshamen qamtylǵan
AQTAÝ. QazAqparat - Mańǵystaýda 3 pen 6 jas aralyǵyndaǵy balalardy balabaqshamen qamtý kórsetkishi 97%-ǵa jetti, dep habarlaıdy QazAqparat tilshisi.
Kezekti apparattyq jıyn barysynda oblystyq bilim basqarmasy basshysynyń orynbasary Aıjaqsy Turjanova osylaı dep málimdedi. Jyl sońyna deıin bul kórsetkish 100%-ǵa jetýi múmkin. Sebebi, oblys boıynsha 2520 oryndyq 20 jekemenshik bóbekjaı ashylady. Sondyqtan, balabaqshamen qamtý oıdaǵydaı júrgizilip jatyr.
Aıjaqsy Turjanovanyń aıtýynsha, «Balapan» baǵdarlamasy men memlekettik-jekemenshik áriptestik aıasynda jyl basynan beri 1100 oryndyq 13 bóbekjaı iske qosylǵan. Nátıjesinde 3-6 jas aralyǵyndaǵy balalardy balabaqshamen qamtý 93%-dan 97%-ǵa deıin artqan.
«Eń bastysy - bilim oryndary materıaldyq tehnıkalyq bazamen tolyq qamtyldy. Bul maqsatta qazynadan 158 mln 720 myń teńge qarjy bólinip, kompıýterler, proektorlar men ınteraktıvti taqtalar alynǵan. Budan bólek, ınternet jyldamdyǵyn odan ári arttyrýǵa 99 mln teńge jumsalǵan»,-deıdi ol.
Degenmen, bilim salasynda sheshimin tappaǵan másele bar. Ol - mekteptegi kadr tapshylyǵy. Máselen, búginde 64 muǵalim jetispeıdi.
«Kóbinde orys tildi mektepterge maman jetispeıdi. 64 maman ishinde solar bar. Óńirge maman tartý úshin BQO men Aqtóbe oblystaryndaǵy JOO-men memorandým jasaldy»,-deıdi Aıjaqsy Turjanova.
