Mańǵystaýlyq belsendiler Joldaýdyń el turmysyn jaqsartýǵa baǵyttalǵanyn aıtty

AQTAÝ. QazAqparat - Elbasy Joldaýyn mańǵystaýlyqtar da yqylaspen tyńdady. Ákimdikte ótken basqosýǵa 100-ge jýyq memlekettik qyzmetshi men qoǵam belsendileri jınaldy. Olar Prezıdenttiń ár bastamasy men tapsyrmalary halyqtyń turmysyn jaqsartýǵa baǵyttalǵan deıdi.  

«Joldaýdaǵy jaǵymdy jańalyq - eń tómengi jalaqynyń 1 qańtardan bastap 1,5 ese ósetini boldy. Sonymen qatar, bıýdjet qyzmetkerlerine aıryqsha kóńil bólinip otyr. Saladaǵy 275 myń qyzmetkerge qazynadan 906 mlrd teńge bólinbek»,-deıdi oblystyq Ardagerler keńesi tóraǵasynyń orynbasary Aqmonshaq Baýyrjanova.

Onyń aıtýynsha, dárigerler men muǵalimderdiń jalaqysyn 35 paıyzǵa kóterý óte durys. Sebebi, olardyń el damýyna qosyp otyrǵan úlesi ólsheýsiz.

Al, qoǵam belsendisi Bektur Tóleýǵalıev Joldaýdy el tirshiliginiń ár salasyn qamtyǵan qujat dep esepteıdi.

«Bul Joldaý elimizdiń damýyna úlken yqpal etetin jańa baǵdarlamalar, jańa baǵyttardy belgilep berip otyr. Ol halqymyzdyń áleýmettik-ekonomıkalyq damýyna yqpal etedi degen senimim mol. Búgin qozǵalǵan árbir bastamany qoldaımyn. Qaı-qaısysyn alyp qarasaq ta, mańyzdy ári ózekti»,-deıdi ol.