Mańǵystaýlyq belsendiler Ybyqtysaı shatqalynan 3 tonna qoqys shyǵardy
Eriktiler, óńirdiń belsendileri men Qazaqstan halqy assambleıasynyń ókilderi Ybyqtysaı shatqaly mańynda senbilik uıymdastyrdy. 50-ge jýyq qatysýshy bir kúnde 3 tonnaǵa jýyq qoqys jınady.
«Bul aktsııa qorshaǵan ortanyń tazalyǵyna biraýyzdan atsalysýǵa baǵyttalǵan. Ókinishke qaraı, qazir tabıǵat aıasyna demalýǵa shyqqan keı adamdar qoqysyn jınamaı, tastap kete beredi. Sonyń saldarynan mekenimizdiń kórnekti jerleri zardap shegedi. Sondyqtan biz osy arqyly jastarǵa, jalpy qala turǵyndary men qonaqtaryna úlgi kórsetkimiz keledi. Qala turǵyndaryn tabıǵatymyzdy aıalap, tazalyqta ustaýǵa shaqyramyn», - deıdi ekobelsendi Sabına Beısembaeva.
Budan bólek belsendiler Saıyn - Shapaǵat kentinde Kaspıı jaǵalaýyn tazartý jumystaryn júrgizdi. Nátıjesinde 70 dorba qoqys jınaldy.
«Aktsııanyń maqsaty - teńiz jaǵalaýyn qoqystan tazartý ǵana emes, sonymen qatar óskeleń urpaqtyń ekologııalyq mádenıetin tárbıeleý men qoǵamnyń nazaryn ekologııa máselelerine aýdarý»,- deıdi aktsııaǵa qatysýshy Hıtesh Vadodarııa.
