Mańǵystaýlyq belsendi jastar jazǵy lagerde bas qosty
«Kógez» etno aýylynda uıymdastyrylǵan lagerge jastar uıymdarynyń ókilderi, erikti jastar, múmkindigi shekteýli jastar, daryndy mektep oqýshylary, jas kásipkerler men vaınerler qatysty.
Basqosýdyń maqsaty - Jastar jyly aıasynda Mańǵystaý ólkesiniń tarıhyn dáripteý, tarıhı sana qalyptastyrý, tól mádenıetimizdi óskeleń urpaqtyń boıyna sińirý.
Oblys ákimi Eraly Toǵjanov beıresmı formattaǵy kezdesýde jastarmen erkin taqyrypta suqbattasyp, kókeıtesti saýaldaryna jaýap berdi. Sonymen qatar, týrızm jáne aýyl sharýashylyq salalaryndaǵy mańyzdy ıdeıalaryn tyńdap, jastar júzege asyrǵan tabysty jobalarmen tanysty. 
Óńir basshysy jastar arasyndaǵy eriktilerdiń atqarǵan isterine toqtaldy.
«Muqtaj jandarǵa kómek kórsetip, olarǵa qýanysh syılaý - eń úlken baqyt. Jaqynda Qazaqstan Prezıdenti Qasym-Jomart Toqaev Qostanaıda ótken eriktiler forýmynda mańǵystaýlyq erikti jastardyń qyzmetin joǵary baǵalap, erekshe atap ótken bolatyn. Osy oraıda men de oblystyq jastar resýrstyq ortalyǵy janyndaǵy «Eriktiler korpýsyna» abyroıly qyzmetteri úshin alǵys aıtamyn. Jalpy, meni qýantatyny erikti jastardyń qatarynyń kóbeıýi», - dedi ákim.
Aıta keterligi, jýyrda Beıneý aýdanynda 10 jyl buryn mektep bitirgen túlekter jınalyp, jaǵdaıy tómen otbasyǵa úı alyp bergen.
Lagerde ulttyq oıyndar (asyq atý, arqan tartý, jamby atý, kókpar, toǵyzqumalaq, urshyq ıirý, aýdaryspaq, teńge ilý) oınatylyp, Sherqala - Aıraqty taýy, Qyzyl qala tarıhı jerine jastar saıahaty jáne jastardyń ekologııalyq aktsııasy uıymdastyryldy.
Aǵash úı mańyna daryndy sýretshi Bekejan Mereıdiń kartınalary qoıylyp, «Óner» kolledji sýretshileriniń pleneri usynyldy.
Jastar ár topqa bólinip, týrızm jáne kásipkerlik taqyrybynda semınar trenıngke qatysyp, jobalarmen jumys jasady. 
