Mańǵystaýlyq balalar neırohırýrgi 200-den asa ota jasaǵan

AQTAÝ. QazAqparat - Mańǵystaý oblysynyń balalar neırohırýrgi Erbol Kenjevalov talaıdyń alǵysyn arqalaǵan dárigerdiń biri. Ol 9 jyldyń ishinde shamamen 10 myńnan astam balaǵa medıtsınalyq kómek kórsetken. Onyń 200-ge jýyǵyna ota jasady,-dep habarlaıdy Qazaqparat tilshisi.

Oblystaǵy jalǵyz neırohırýrg balalar aýrýhanasynda jumys isteıdi. Oǵan qosa, perınataldyq ortalyqtarda jańa týǵan sábılerdi emdeıdi. Al, shalǵaıdaǵy aýyldardan shaqyrtý kelse, sanıtarlyq avıatsııamen ushyp barady.

«Aptasyna 2-3 shaqyrtý bolady. Beıneý, Jańaózen jáne t.b aýdandarǵa baryp, ota jasaıtyn kezim bolady. Shaqyrtýlar kúndiz-túnge qaramaıdy. Negizgi jumys arasynda da kete beremiz. Kóbinese balalar arasynda bıikten qulaý, kólik soǵý sııaqty jaǵdaılar tirkeledi. Aıaq astynan alǵan jaraqattar úshin barýǵa týra keledi. Sebebi, dereý alǵashqy kómek kórsetip, zardap shegýshiniń jaǵdaıyn jaqsartý - paryzym», - deıdi balalar neırohırýrgi Erbol Kenjevalov.

Dáriger balalar arasynda beleń alǵan mıǵa sý jınalý, qabyný, týa bitti julyn aqaýlary sııaqty kúrdeli aýrýlardy ota arqyly emdeıtin tájirıbeli maman. Kúndelikti jumysy qarbalaspen ótetin dáriger osy mamandyqty tańdaǵanyna esh ókinbeıtinin aıtady. Kerisinshe, zaman talabyna saı, medıtsınadaǵy jańa tehnologııany meńgerip, taǵy da biraz naýqastardy aıaqqa turǵyzatynyna senimdi.