Mańǵystaýlyq 3 sportshy djıý-djıtsýdan álem chempıony atandy

AQTAÝ. QazAqparat - Mańǵystaýlyq úsh sportshy djıý djıtsýdan álem chempıony atandy. Ýkraınada ótken álemdik básekede Azamat Abaev, Ábýbákir Jánibekov jáne Álııa Tilepova «altyn» aldy, dep habarlaıdy QazAqparat tilshisi.

Djıý djıtsýdyń «kombat» sıstemasy boıynsha ótken birinshilikke 17 elden 300-ge tarta sportshy qatysqan.

Tájirıbeli sportshy Ábýbákir Jánibekov úshin bul chempıonatta top jarý asa qıyn bolmaǵan. Óıtkeni, buǵan deıin alty ret álemdik básekege qatysyp onyń barlyǵynda kúmis pen qolanyń bıigin baǵyndyrǵan. Endi mine júldeleriniń qataryn altynmen tolyqtyrdy. Ol jarys barysynda bes beldesý ótkizip, qarsylastarynyń barlyǵyna múmkindik qaldyrmaǵan.

«Birinshi kezdesýim Panama sportshysymen, ekinshi kezdesý Iran sportshysy, úshinshisi ózbek balýany boldy, tórtinshi qazaq balýan, fınalda da qazaq sportshymen shyqtym 7-5 upaıymen jeńiske jettim»,-deıdi Ábýbákir Jánibekov.

Mańǵystaý quramasy sapynda jarysqa qatysqan jalǵyz qyz – Álııa Tilepova. Álııa Azııa chempıony, eki márte álemdik synnyń qola medalin ıelengen. Biraq bul chempıonat Álııa úshin ońaı bolmaǵan.

«Fınalda ýkraına qyzymen kezdestim. 5-4 bolyp utylyp jatqan kezde sońǵy sekýndtarda utyp kettim»,-deıdi Álııa Tilepova.

Al, Azamat Abaev álem chempıonatynan alǵash ret júlde aldy. Ótken jylǵy chempıonat ol úshin sátsiz ótken bolatyn. Bıyl bapker qoıǵan mejeni oryndap shyqty. 94 kelide synǵa túsken Azamat chempıonatta Polsha, Ýkraına, Latvııa sportshylaryn jeńip , fınalda Qazaqstan quramasynyń taǵy bir ókilimen kezdesken. Osylaısha ol bapkeri men jankúıerleri artqan senimniń údesinen shyqty.