Mańǵystaýlyq 2 fýtbolshy «Arsenal - Kıev» FK joldama aldy
AQTAÝ. QazAqparat -Mańǵystaý oblysynyń ákimdigi men Ýkraınanyń «Arsenal-Kıev» FK arasynda Mańǵystaý fýtbolyn damytý úshin sport salasyndaǵy ózara yntymaqtastyq týraly memorandýmǵa qol qoıdy. Bul týraly QazAqparat ákimdiktiń baspasóz qyzmetine silteme jasap habarlaıdy.
Memorandým aıasynda óńirdegi fýtboldy damytý, «Kaspıı» fýtbol klýby men Ýkraınanyń «Arsenal-Kıev» arasyndaǵy áriptestikti kúsheıtý. Sonymen qatar, mańǵystaýlyq talantty jas fýtbolshylardyń sheberligin shyńdaý úshin sheteldik klýbtarǵa joldama berý jáne ınfraqurylymdy damytý kózdelgen.
Mańǵystaý turǵyndaryna tosynsyı bolǵan taǵy bir jańalyq atalmysh memorandým sheńberinde «Kaspıı» fýtbol klýbynyń 2 oıynshysy - Myrzabek Altynbek /2000jyly týylǵan/ (Mańǵystaý polıtehnıkalyq kolledjiniń stýdenti) pen Nurǵazıev Janbolat /2000 jyly týylǵan/. («Keleshek» kolledjiniń stýdenti) «Arsenal-Kıev» FK-men kelisimshart negizinde irikteýden ótip, joldama alyp otyr.
«Qazirgi alǵa qoıǵan basty maqsatymyz «Kaspıı» fýtbol klýbynyń respýblıkalyq arenada básekege qabilettiligin arttyrý. Sonymen qatar, atalmysh klýbymyzdyń birinshi lıgada úzdik óner kórsetip, aldyńǵy qatarda kórinýine yqpal etýdi kózdep otyrmyz. Jumysymyz nátıjeli bolý úshin bapkerlik quramdy tańdaýdy basty nazarǵa alýymyz kerek. Oblysymyzdaǵy fýtboldy júıeli túrde damytý maqsatynda ártúrli jastaǵy komandalardy daıyndaýdy bir jolǵa qoıýymyz qajet. Sol úshin búgin biz sheteldik mamandardy atap aıtsam, «Arsenal-Kıev» fýtbol klýbynyń prezıdenti zoraatııalyq Ivıtsa Pırıch pen «Arsenal-Kıev» fýtbol klýbynyń sport dırektory Vladımır Rıbıchti óńirimizge arnaıy shaqyrttyq» - dedi Eraly Toǵjanov.
Memorandým aıasynda eki jaqty kelisimge kelip, alda atqarylatyn jumystar josparlandy. Naqtyraq aıtsaq, fýtbolshylardy arnaıy baǵdarlamamen oqytyp daıyndaý, fýtboldy buqaralyq sıpatta damytý jáne marketıng salasy boıynsha birlese jumys jasaýdy qolǵa alý kerektigi aıtyldy. Sonymen qatar, medıtsına, ǵylymı-tehnıkalyq taǵy da basqa baǵyttar boıynsha tájirıbeni arttyrý kózdelgen.
