Mańǵystaýǵa jol apatynda kóz jumǵan ózbekstandyqtardyń týystary keldi
ASTANA. QazAqparat - Mańǵystaýǵa Aqtaý-Beıneý jolynda kólik apatynan qaza tapqandardyń týystary keldi, dep habarlaıdy lada.kz
Olar DNQ saraptamaǵa qatysady. Bul týraly Ózbekstan Respýblıkasynyń Tótenshe jaǵdaılar jónindegi mınıstrliginiń ókilderi málim etti.
ÓR TJM habarlaýynsha, búgin 2 naýryzda marqumdardyń denesi elderine jetkizý josparlanǵan.
«Marqumdardyń deneleri ázirge Qazaqstanda. Bizdiń ókilder qazir sonda júr. Týystary DNQ saraptama júrgizý úshin shaqyrtyldy», - dep málim etti Ózbekstan TJM.
Eske sala ketsek, 1 naýryzda Aqtaý - Beıneý avtojolynda, Mańǵystaý aýdanynyń Shetpe aýyly mańynda jeńil mashına júk kólikpen soqtyǵysqan bolatyn. Avtomobıl órtenip, oqıǵa ornynda 7 adam qaza tapqan, sonyń altaýy Ózbekstan azamaty bolǵan.
Jetinshi jolaýshynyń aty-jóni anyqtalyp jatyr. Osy oqıǵaǵa qatysty QR QK-niń 345 babyna sáıkes sotqa deıingi tergeý júrgizilýde.
