Mańǵystaýǵa Túrkistan men Aqtóbe oblystarynan shóp jetkizilip jatyr
Mańǵystaý oblysyndaǵy qýańshylyqqa baılanysty mal baǵyp otyrǵan sharýalarǵa qolushyn berýge búkil el jumyla kiristi.
Túrkistan oblysynyń turǵyndary men eriktileri oblys ákimdiginiń qoldaýymen osy kúnge deıin 33 vagon shóp jóneltken. Onyń jeteýin Qurmet Talapqazy bastaǵan eriktiler jibergen. Qalǵan shóp tıelgen vagondardy tasymaldaýǵa «Qazaqstan temir joly» ulttyq kompanııasy qoldaý kórsetti.
Kelisimderge sáıkes mal azyǵyn jetkizý jumystary tegin júrgiziledi. Túrkistan oblysy ákimdigi jáne «Qazaqstan temir joly» ulttyq kompanııasy qajet bolǵan jaǵdaıda daıyndalǵan jem-shópti tasymaldaý úshin 100 vagon usynýǵa daıyn ekendikterin bildirdi.
Túrkistannan shyqqan 8 vagon mal azyǵy erteń Jańaózen qalasy men aýdandarǵa jetkiziledi.
Aqtóbe oblysynyń sharýa qojalyqtary men kásipkerleri de júk kólikterimen shóp alyp kele jatyr.
Aldaǵy aptada Úkimetten bólinetin 1,9 mlrd teńge mańǵystaýlyq sharýalarǵa úlestirile bastaıdy. Sonymen qatar Mańǵystaý oblysy ákiminiń bastamasymen óńirde shóp shabýshylarǵa belgili mólsherde janar-jaǵarmaımen kómek beriledi.
