Mańǵystaýǵa «Spýtnık-V» vaktsınasynyń alǵashqy partııasy jetkizildi

AQTAÝ. QazAqparat - Mańǵystaýǵa «COVID-19» ınfektsııasyna qarsy «Spýtnık-V» vaktsınasynyń 1000 dozasy arnaıy ushaqpen jetkizildi, dep habarlaıdy QazAqparat tilshisi oblystyń qoǵamdyq kommýnıkatsııa ortalyǵyna silteme jasap.

Oblystyq densaýlyq saqtaý basqarmasynyń bólim basshysy Ǵalııa Qalıevanyń málimetinshe, «SK-Farmatsııa» JShS jetkizgen ekpe oblystyq densaýlyq saqtaý basqarmasynyń vaktsınatsııa qoımasynda saqtalady.

«Aldymen erikti túrde ınfektsııalyq aýrýhanada jumys isteıtin medıtsına qyzmetkerlerine ekpe salynady. Munan soń jedel járdem, emhanada qyzmet etetin mamandar egiledi. Aıta ketetin jaıt, erikti túrde vaktsına alatyn adamda profılaktıkalyq egýge qarsy kórsetilimder bolmaýy tıis. Vaktsına salar aldynda dáriger mindetti túrde tekseredi», -dedi Ǵalııa Qalıeva.

Jyldyń sońyna deıin Mańǵystaýǵa qazaqstandyq «Qaz Covid-in» vaktsınasynyń 100 myń dozasy jetkiziledi dep josparlanyp otyr.