Mańǵystaýǵa Qyzyl kitapqa engen qarabaı qusy ushyp keldi⠀

AQTAÝ. QazAqparat - Mańǵystaýǵa Qyzyl kitapqa engen qarabaı qusy ushyp keldi, dep habarlaıdy QazAqparat tilshisi.

«Qarabaı qusy Qazaqstannyń Qyzyl kitabyna engizilgen. Mańǵystaýǵa kúzgi jáne kóktemgi kóshi-qon kezinde ushyp keledi. 2022 jylǵa deıin óte sırek kezdesetin. Ótken jyly da ushyp keldi. Qarabaılar óńirde Qarakólge keledi», - dedi «EcoJer» qaýymdastyǵynyń Mańǵystaý oblysy boıynsha óńirlik ekologııalyq keńesiniń múshesi, Ekologııa, geologııa jáne tabıǵı resýrstar mınıstrligi Qoǵamdyq keńesiniń múshesi Ádilbek Qozybaqov.

Ekologtyń aıtýynsha, qarabaılar Kaspııdiń soltústik jaǵalaýynda jáne Edil men Oral, sondaı-aq Atyraýdan soltústikke qaraı 60 shaqyrym jerde Oraldyń tómengi aǵysynda uıa salady. Buryn Syrdarııanyń tómengi aǵysynda, Torǵaıda jáne Іle alaptaryn mekendegen.