Mańǵystaýǵa qoqıqazdar kelip jatyr
Kvadrokoptermen túsirilgen beınejazbany jergilikti bloger Azamat Sársenbaev jarııalady.
Onyń aıtýynsha, júzdegen qyzǵylt qoqıqaz Mańǵystaýdaǵy Qarakólge kelip qonǵan. Olar qarasha aıynyń ortasyna deıin osynda mekendeýi kerek. Odan keıin Iranǵa qaraı ushady.
Eske salsaq, buǵan deıin Nur-Sultan qalasynyń shet jaǵyndaǵy Kishi Taldykólge bir top qoqıqaz ushyp kelgeni habarlanǵan bolatyn.
Eko-belsendi Sáken Dildahmettiń aıtýynsha, qustyń bul túri Qazaqstannyń Qyzyl kitabyna engizilgen jáne álemde onyń 10-nan astam túri kezdesedi.
«Qoqıqazdar bizdiń elge Afrıka, Túrikmenstan, Aýǵanstan elderinen ushyp keledi. Sáýir aıynda kelip, kún sýytqansha (qyrkúıek, qazan aılaryna deıin) bolady. Qoqıqazdardyń elordaǵa jaqyn jerdegi negizgi mekeni Qorǵaljyn qoryǵy, olarda sonda mekendep, kóbeıedi. Mamandardyń aıtýynsha, elimizge jyl saıyn 100 myńǵa jýyq qoqıqaz ushyp keledi eken. Onyń ishinde Aqmola, Qostanaı, Jambyl jáne Mańǵystaý oblysynyń aýmaǵyn mekendeıdi. Taldykólge kelsek, mamandardyń málimdeýinshe, munda kishi jáne úlken 100-den astam qus mekendeıdi. Onyń qatarynda qoqıqaz, aqqý, qaz, úırek, shaǵala, birqazan jáne taǵy basqa qustar bar. Taldykólge kelgen bul qoqıqazdyń bıylǵy balapandary. Olar jyly jaqqa ushpas buryn osyndaı kól men kólshikterge toqtap, ál jınap, odan ári ushady», - deıdi Sáken Dildahmet.