Mańǵystaýǵa keletin týrıster sany eki jylda 6%-ǵa kóbeıdi
2021 jyly óńirge 29 myń saıahatshy kelse, byltyr bul kórsetkish sáıkes kezeńmen salystyrǵanda 41 myńǵa jetken.
Oblystyń ońtústigi men soltústiginde týrıster erekshe qyzyǵýshylyq tanytatyn 200-ge jýyq tarıhı-mádenı oryn bar. Ásirese, túbektiń ońtústik betkeıindegi «Beket ata» jerasty medrese-meshiti men «Bozjyra» shatqaly suranysta. Jalpy, saıahatshylar nazaryna óńirdegi 13 myńnan astam ólketaný eskertkishteri men tarıhı-mádenı oryndar usynylady.
«Mańǵystaýdyń soltústik baǵyttaǵy týrıstik oryndary saıahatshylardyń qyzyǵýshylyǵyn týdyrady. Máselen, Taýshyq aýylynyń mańynda 1941-1943 jyldary 8 shahta jumys istegen. Óndirilgen kómir «Sartas» teńiz porty arqyly soǵys ýaqytynda Reseıge jóneltilgen. Al, «Jalbyrttyń saıy» tabıǵat qolymen bederlengen tas músindermen erekshelenedi. «Shaqpaq ata» jerasty meshiti tarıhı derekterge baı», - deıdi Mańǵystaý oblystyq týrızm basqarmasynyń basshysy Máýlen Ǵabdýlqalıev.
Túbek tabıǵatyn tamashalaǵysy keletin týrıster úshin qolaıly jaǵdaı da jasalyp jatyr. Máselen, Sartas shyǵanaǵy aýmaǵynda ótken jyly zamanaýı úlgidegi ortalyq ashylǵan. Sodan beri Almaty, Astana qalalarynan 700-den asa týrıst saıahattap úlgeripti.
«Bir mezette 100 adam tamaqtanyp, 20 týrıst qona alady. Aldaǵy ýaqytta ortalyq aýmaǵynda 6, 8,16 qanatty 9 kıiz úı tigýdi josparlap otyrmyz. Týrıster qazaq halqynyń mádenıetin, turmys tirshiligin, sonymen qatar gastronomııasymen tolyq tanysa alady», - deıdi «Sartas sapar» ortalyǵynyń dırektory Erbol Baıjigitov.
Saıahatshylar kıeli mekenniń tylsym tarıhyn zerdelep, túbektiń ejelgi Tetıs teńiziniń tabany bolǵandyǵyn dáleldeıtin kóne derektermen tanysa alady. Qasqyr tisterin, Vızantııa eliniń teńgelerin kórip, tabıǵı ónimderdiń dámin tatyp, taza aýada demalýyna múmkindik bar.
