Mańǵystaýǵa keletin týrıster sany 177 myńnan asty

NUR-SULTAN. QazAqparat – Bıyl Mańǵystaýǵa kelgen týrıster sany shamamen 177 myńnan asty. Bul týraly Mańǵystaý oblysynyń ákimi Serikbaı Trumov Ortalyq kommýnıkatsııalar qyzmetinde ótken onlaın brıfıngide málim etti, dep habarlaıdy QazAqparat tilshisi.

Oblys ákiminiń aıtýynsha, Mańǵystaý – elimizdegi týrızmdi damytýǵa qolaıly aımaqtardyń úzdik ondyǵyna kiredi. Aqtaý qalasynda jaǵajaı týrızmin, al aýdandarda eko-etnotýrızmdi damytýǵa múmkindik zor. Búginde óńirdegi týrızmdi órkendetý maqsatynda keshendi jospar jasaqtalyp, salany jetildirý baǵyty aıqyndaldy. Osy jumystyń nátıjesinde bıyl óńirimizge 117 myńnan astam týrıst kelgen. Onyń 67 myńnan astamy shilde aıynda ashylǵan «Rıksos Aqtaý» qonaq úı demalys keshenine kelgender. «Rıksos Aqtaý» jobasy Ortalyq Azııadaǵy kýrorttyq tıptes eń iri otel. Bul joba aımaq týrızimniń damýyna tyń serpin berdi.

«Osy jyldyń 2-shi toqsanynda osy týrızm salasynda 1 mlrd teńgeniń qyzmeti kórsetilgen. Bıyl óńirge 177 myń týrıst kelgen. Onyń basym bóligi jaz aılarynda qydyryp kelgen. Aqtaý qalasynyń «Jyly jaǵajaı» teńiz kýrorttyq aımaǵyn ınfraqurylymmen qamtý maqsatynda Úkimettiń qoldaýymen 17 mlrd teńgege 31 shaqyrym jol salyndy. 2020 jyldyń 1-jartysynyń qorytyndysymen týrızm salasyna salynǵan ınvestıtsııa kólemi 68,7 mlrd teńgeni qurap, 3,7 esege artty», - dedi oblys ákimi S. Trumov.

Óńirde jyly jaǵajaıda jobalardy iske asyrýdyń ekinshi kezeńi bastaldy. Onda 5 qonaq úı salynady. Qazir úsheýiniń qurylysy bastalyp ketti. Jyly jaǵajaıda jańa qonaq úıler, golf klýb, taqyryptyq oıyn-saýyq saıabaǵyn salý josparlanǵan. Jalpy joba quny 1.2 mlrd AQSh dollary.

«Munyń barlyǵy Qazaqstan Respýblıkasynyń Tuńǵysh Prezıdenti, Elbasymyz N.Nazarbaevtyń bastamasymen júzege asyrylyp jatyr. Ózderińiz bilesizder 2018 jyly Aqtaýda ótken Samıtte Elbasy Aqtaý - teńiz kýrortyna aınalýy tıis dep, kýrortty aımaqty damytýdy tapsyrǵan bolatyn», - dedi oblys ákimi.