Mańǵystaýǵa Aqtóbe oblysynan jem-shóp jetkiziledi
«Qazirgi ýaqytta Mańǵystaý oblysynda aýa raıynyń jaýyn-shashynsyz bolýyna baılanysty qurǵaqshylyq oryn alyp otyr. Osyǵan oraı mınıstrlik tarapynan arnaýly jumys toby quryldy. Jumys toby 26-30 mamyr aralyǵynda Mańǵystaý oblysynyń barlyq aýdandaryn aralyp, qalyptasqan jaǵdaımen tanysyp shyqty. Osy aıda mınıstrlik tarapynan da, Úkimet tarapynan da jedel is-sharalar qabyldaý maqsatynda ákimshilik deńgeıde arnaýly shtab quryldy. Shtabtyń negizgi maqsaty - mal ólimi jáne mal azyǵy naryǵynda alypsatarlyq oryn almaýy úshin jem-shóp jetkizý», - dedi ol.
Erkebulan Ahmetovtiń sózine qaraǵanda, shtab ótken aptada Aqtóbe oblysynda bolyp, kelissóz júrgizdi. Kelissóz nátıjesinde Mańǵystaý men Aqtóbe oblystary ákimdikteri arasynda memorandým jasaldy. Memorandým aıasynda Qobda, Baıǵanın, Temir aýdandarynda shóp shabatyn shabyndyqtar anyqtaldy. Sol jerlerden mańǵystaýlyq fermerlerdiń malyna shóp jetkizý uıymdastyrylady.
«Sonymen qatar byltyrǵy jyldan qalǵan 10 myń tonna jońyshqany jetkizý máselesi pysyqtaldy. Munan bólek, aqtóbelik sharýalardyń jem-shópti tasymaldaý jaıy qarastyryldy. Qaziri «Kaspıı» ÁKK arqyly 204 mln teńge qarajat bólindi. Qarajat atalǵan jem-shópti satyp alý jáne tasymaldaý shyǵyndaryn jabýǵa jumsalady. Onyń ishinde 54 mln teńgege 630 tonna arpa «Azyq-túlik kelisimshart korporatsııasynan» bólinedi. Qazir satyp alý rásimdelip jatyr. Kelesi aptaǵa deıin arpany temir jolmen jetkizý máselesi sheshiledi», - dedi departament dırektory.
Onyń atap ótýinshe, Mańǵystaý oblysynda 536 bas jylqy ólgen. Veterınarlyq organdardyń ókilderi ólekselerdi kómý jumystaryn uıymdastyrdy. Jylqy ólim-jitimi negizinen Túpqaraǵan, Mańǵystaý aýdandarynda tirkelip otyr.
«Búgingi naqty maqsat – mal ólimine jol bermeý. Ol úshin jem-shópti tezirek jetkizý kerek. Mańǵystaý oblysynda ortasha temperatýra +35, +40 gradýs bolyp tur. Kelgen shyǵyndy anyqtaý jumystary júrgizilip jatyr», - dedi ol.
