Mańǵystaýdyń úzdik kásipkerleri marapattaldy
Qatysýshylardyń 14-i kórmege ónimderin shyǵardy. Bıylǵy baıqaýda tanymal kásiporyndarmen qatar kásibin jańadan bastaǵan taýar óndirýshilerdiń de ónimderimen tanysýǵa múmkindik týdy.
«Qazaqstannyń úzdik taýary» - ulttyq brend deńgeıine kóterilgen bedeldi shara. Kórme-baıqaý dástúrli túrde uıymdastyrylyp keledi. Sondyqtan da baıqaýǵa qatysý - kásiporyndardyń ózin tanytýǵa, taýaryn jarnamalaýǵa, tutynýshy qataryn arttyrýǵa zor múmkindik bolyp sanalady. Sonymen qatar jergilikti taýaróndirýshilerdi qoldaý, otandyq ónimderdiń sapasyn arttyrý, ınvestıtsııa tartý, jańa seriktes tabý, bıznestiń jańa baǵytyn ashýǵa da serpin bermek. Baıqaý maqsaty - ónimderdi kóbeıtý, aımaq naryǵynda ónimderdi joǵary sapaly jáne básekege qabilettiligin arttyrý jáne halyq arasynda sapa ıdeıasyn tanymal etý maqsatynda uıymdastyryldy.
«Mańǵystaý oblysy - Qazaqstannyń eń qarqyndy damyp kele jatqan aımaǵynyń biri, eldiń jalpy ishki ónimi 5,6 % -yn quraıdy. Jyl saıyn bizdiń oblysta orta eseppen 914 jańa kásiporyn ashylyp jatyr. Mańǵystaý oblysynda 9 595 kásiporyn bar, onyń ishinde 306 iri jáne orta. Údemeli ındýstrııalyq-ınnovatsııalyq damýdyń memlekettik baǵdarlamasy boıynsha oblystyń Indýstrııalandyrý kartasyna 22 joba engizildi. Qazirgi kezde Eýrazııalyq ekonomıkalyq qaýymdastyǵy (EýrAzEQ) men Dúnıejúzilik saýda uıymy (DSU) aıasynda joǵary sapaly ári básekege qabiletti ónimderdi shyǵarýǵa erekshe nazar aýdarylyp otyr. Bizdiń kásipkerler ýaqytpen sanaspaı eńbek etip, tutynýshylardyń suranysyna saı, shama kelse bir adym alda júrýi qajet», - deıdi sharaǵa qatysqan Mańǵystaý oblysynyń ákiminiń orynbasary Rýslan Sakeev.
Bul shara 2006 jyldan bastap elimizde óńirlik jáne respýblıkalyq deńgeıde ótkizilip keledi. 2015 jyldan bastap atalmysh baıqaýdy «Atameken» Ulttyq kásipkerler palatasy uıymdastyrýda.
Mańǵystaý oblysynyń «Atameken» kásipkerler palatasynyń dırektory Nurbek Qarasaevtiń aıtýynsha, Memleket basshysy «Qazaqstan 2050» strategııasynda otandyq bıznesti ishki tabysty ósirýdiń eń mańyzdy kózi retinde belgiledi. Bizdiń oblystyń kásipkerleri jańa bastamalardy belsendi túrde qoldaıtynyna senimdimin. Osylaısha olar ekonomıkanyń ósýine jáne halyqtyń ál-aýqatynyń odan ári jaqsarýyna úles qosady.
Synaq «Óndiristik maqsattaǵy úzdik taýarlar», «Halyq tutynatyn úzdik taýarlar», «Úzdik azyq-túlik taýarlary» dep atalatyn úsh atalym boıynsha ótti. Saraptamalyq komıssııa jeńimpazdardy anyqtady.
«Óńirlik maqsattaǵy úzdik taýarlar» atalymy boıynshy «Kaspıı Bıtým» JShS, «Kaskor-Mashzavod» AQ, «Parker-Kazahstan» JShS top jardy.
«Halyq tutynatyn úzdik taýarlar» atalymynda «Janarys» JShS, «Jekenova Ásel» JK, «Domık» JK jeńiske jetti.
Al, «Úzdik azyq-túlik taýarlary» atalymy boıynsha « «Segizbaı Ata» aýylsharýashylyǵy kooperatıvi» ÓK, «Sáýkimbek» JShS, «Bereket-F» JShS úzdik ónim ıesi atandy.
Jeńimpazdarǵa arnaıy dıplomdar tabystaldy. Sharaǵa oblys turǵyndary men qonaqtary qatysyp, jergilikti kásipkerler usynǵan otandyq ónimderdiń kórmesin tamashalady.
Jeńiske jetken kásiporyndar Mańǵystaý oblysy atynan «Qazaqstannyń úzdik taýary» respýblıkalyq baıqaýyna jáne «Qazaqstanda jasalǵan» kórmesine qatysatyn bolady. Respýblıkalyq baıqaý Astana qalasynda 12-13 qazan kúnderi ótedi dep josparlanǵan.
