Mańǵystaýdyń turǵyn-úı kommýnaldyq sharýashylyq salasynda atqaratyn is kóp
AQTAÝ. QazAqparat - Mańǵystaý oblysynyń ákimi Eraly Toǵjanovtyń tóraǵalyǵymen turǵyn-úı kommýnaldyq sharýashylyq salasynyń ózekti máselelerine arnalǵan jıyn ótti, dep habarlaıdy oblys ákimdiginiń baspasóz qyzmeti.
Jıynǵa turǵyn-úı kommýnaldyq sharýashylyq salasyndaǵy barlyq qyzmet kórsetetin mekeme basshylary, páter ıeleri kooperatıvteri, quqyq qorǵaý organynyń basshylary men múddeli memlekettik organ jáne kásiporyn basshylary, oblystyq jáne qalalyq máslıhat depýtattary qatysty.
«Elbasy 5 qazandaǵy Joldaýynda kommýnaldyq qyzmet pen tabıǵı monopolııalardy retteý salalarynda tarıftiń jasalýy jáne tutynýshylardan jınalǵan qarjynyń jumsalýy áli kúnge deıin ashyq emestigi týraly aıtyp, osy salada naqty sheshimder qabyldaý týraly tapsyrma berdi. Rasynda jeke páter ıeleri kooperatıvteriniń (PIK) qyzmetinde másele barshylyq. Tutynýshylardan jınalǵan qarajatty paıdalanýda ashyqtyq joq. Búginde PIK-tar óz qyzmetkerlerine joǵary jalaqy belgileıdi, shtatty negizsiz ósirý faktileri bar. Bul - olardyń tarıfterden jınalǵan qarajatty paıdalanýda ashyq saıasat júrgizbeıtindigin kórsetedi. Halyqtan tarıfterdiń kúrt ósýi boıynsha kóptegen shaǵymdar kelip túsýde. Búgingi jınalystyń basty maqsaty atalǵan máseleniń sheshý joldaryn qarastyrý dedi»,- óńir basshysy.
Oblystyq Energetıka jáne turǵyn úı-kommýnaldyq sharýashylyq basqarmasy basshysynyń mindetin atqarýshy Jandos Salımov oblys boıynsha turǵyn-úı qorynyń aǵymdaǵy jaǵdaıy jáne turǵyn-úı kommýnaldyq sharýashylyǵy suraqtary boıynsha QR birqatar zańnamalyq aktilerine ózgerister jáne tolyqtyrýlar engizý zańnamasy jóninde baıandama jasady.
Qazirgi ýaqytta Mańǵystaý oblysynyń turǵyn úı qory 1 654 kóp qabatty turǵyn úıdi quraıdy. Onyń ishinde Aqtaý qalasynda - 981 úı, Jańaózen qalasynda 262 úı jáne aýdandarda 411 úı bar. Oblys boıynsha kúrdeli jóndeý júrgizýdi qajet etetin úıler sany - 290 úı (17,5%), sondaı - aq apatty jaǵdaıdaǵy úıler sany - 8.
2011-2018 jyldar aralyǵynda turǵyn úı kommýnaldyq sharýashylyǵyn jańǵyrtý baǵdarlamasy aıasynda 1622,0 mln. teńge somasyna 40 úı jóndelgen.
Osy sııaqty málimetterden qanyqqan Mańǵystaý oblysynyń ákimi Eraly Toǵjanov quzyrly organ ókilderine birqatar tapsyrmalar berdi.
Atap aıtqanda memlekettik sáýlet-qurylysty qadaǵalaý basqarmasy jańadan salynǵan úılerdiń tehnıkalyq pasporttaryn qurylys salýshy esebinen jasaqtaýy qajet. Al qala jáne aýdan ákimderi 2018 jyldyń 1 jeltoqsanyna deıin tirkelmeı qalǵan kóp qabatty úılerdi bıýdjet qarajaty esebinen memlekettik tirkeýden ótkizýi tıis. Sondaı-aq ákimder kópqabatty úılerdiń aldyn abattandyryp, qoldanystaǵy balalarǵa arnalǵan sporttyq jáne oıyn alańshalaryn qalpyna keltirip, qajet bolsa jańasyn salýlary qajet. Atalǵandamen qatar osy nysandardy odan ári kútip ustaý jumystary qamtamasyz etilýi qajet ekenin eskertti.
«Oblystyq prokýratýrany, qala jáne aýdan ákimderimen birlesip kondomınıýmnyń sandaryn basqarý organdarynyń qyzmetteriniń qoldanystaǵy Zańǵa sáıkestigin tekserýdi jáne qadaǵalaýdy suraımyn»,- dedi oblys ákimi.
Osyǵan deıin Mańǵystaýda ınvestıtsııa qaı salaǵa kóp tartylǵandyǵy týraly jazdyq.
