Mańǵystaýdyń shalǵaıynda ornalasqan Beıneý aýdanynda 3 jylyjaı salynady

AQTAÝ. QazAqparat - Bıyl Beıneý aýdanynda aýmaǵy 3500 sharshy metrdi quraıtyn 3 jylyjaı salynady. Jobany aýdannyń 3 kásipkeri júzege asyrady. Bul týraly Qoǵamdyq kommýnıkatsııa ortalyǵynda ótken brıfıngte Beıneý aýdanynyń ákimi Beıneýbek Ábilov málim etti.

Onyń aıtýynsha, Tólep aýylyndaǵy «Ǵıbrat» sharýa qojalyǵy 10 ga jerge, Aqjigit aýylyndaǵy «Bas Ústirt» sharýa qojalyǵy 2 ga jerge baý-baqsha ónimderin egýdi bastap ketti. Nátıjesinde 10 jumys orny ashylady. Boranqul aýylyndaǵy «Ótesin» sharýa qojalyǵy 7 ga jerge arpa, bıdaı jáne jońyshqa egý jumystaryn júrgizip otyr. 4 jumys ornyn ashý josparlanýda.

«Sondaı-aq, «Ǵıbrat» sharýa qojalyǵy jylyjaıǵa qııar egip bastady. Jeke kásipkerler «QazTransOıl» aktsıonerlik qoǵamymen kelisimshartqa otyrady. Sodan soń jerasty qudyqtary arqyly sý tartyp, tamshylatyp sýarý ádisin qoldanýdy kózdep otyr. Jalpy aýdanda «Nur Kapıtal» baǵdarlamasy arqyly 14 kásipker 197,3 mln. teńge kóleminde nesıe aldy. Osy baǵdarlamamen júzege asqan jobalar aıasynda Beıneýde 79 jańa jumys orny ashyldy», - dedi Beıneýbek Ábilov.