Mańǵystaýdyń shalǵaı aýdanynda jańa demalys orny salynbaq
Túpqaraǵan aýdanynyń aýmaǵynda týrızm salasyn damytý baǵytynda «Syǵyndy» jeri №6 ýchaskede demalys orny ashylady. Jobany jeke kásipker júzege asyrady. Bul týraly Qoǵamdyq kommýnıkatsııa ortalyǵynda ótken brıfıngte Túpqaraǵan aýdanynyń ákimi Aıbek Qosýaqov málim etti.
Onyń aıtýynsha, qurylys jumystary 3 kezeńnen turady. 1-kezeńde qonaq úıler men eki qabatty nysan salý josparlanyp otyr. 2-kezeńde 2022-2024 jyldary atalǵan demalys ornynda basseın salý kózdelip otyr. Al 3-kezeń 2025 jyly iske asady. Bul kezeńde akvapark qurylysyn bastaý josparlanǵan.
«Jobanyń maqsaty – demalýshylardy maýsymdyq mezgilden basqa ýaqytta da qabyldaý. Balalar demalysyn uıymdastyrý múmkindigi de qarastyrylyp otyr. Demalys kesheni bir mezette 500 adamdy qabyldaı alady. Keshen aýmaǵy akvapark, basseınder, meıramhana, kafe, kınoteatr jáne balalar oıyn alańdarymen qamtamasyz etiledi. Sonymen qatar aýdanda ishki, syrtqy týrızm damyp, jańa jumys oryndary qurylady. 60 adam turaqty jumyspen qamtylady dep kútilýde. Qurylys 2025 jyly aıaqtalmaq», - dedi Aıbek Qosýaqov.
