Mańǵystaýdyń Qaraqııa aýdanynda 2500-den astam jańa jumys orny quryldy
Bul týraly Mańǵystaý oblysynyń qoǵamdyq kommýnıkatsııalar ortalyǵynda ótken brıfıngte Qaraqııa aýdanynyń ákimi Qydyrberdi Bekov habarlady.
Spıkerdiń aıtýynsha, byltyr aýdanda jumyssyzdyq boıynsha tirkelgender sany 2418 adam edi, onyń 2188-i áleýmettik qoldaý sharalarymen qamtylǵan.
Atap aıtqanda: 457 adam turaqty jumysqa, 332 - adam aqyly qoǵamdyq jumysqa ornalastyrylyp, 70 adam áleýmettik jumys oryndaryna, 95 adam jastar praktıkasy boıynsha ornalastyrylsa, 60 adam qaıtarymsyz grant, 40 adam nesıe alǵan.
127 adam «Bastaý Bıznes» jobasy boıynsha kásipkerlik negizderine oqytylǵan. 14 adam qysqa merzimdi kásiptik kýrsta oqytyldy. Jalpy, 2500-den astam jumys orny qurylǵan.
«Aýdanymyzda jumyssyzdyq máselesin azaıtýǵa baǵyttalǵan «Jumys isteımin» jańa jobasyn iske asyrýǵa 25,5 mln teńge bólinip, 2021 jyly 106 azamat jumysqa ornalastyryldy. Atap aıtqanda 72-si «AktaýTýrızmLTD» JShS, 5-ýi JK «AsetDekor», 4-ýi «KarakııaGaz» JShS jáne t.b mekemelerge ornalasty. Búgingi tańda aýyldardyń belsendi azamattary óz bastamalarymen arnaıy top quryp, óz aýyldary boıynsha jumyssyz halyqtyń tizimin shyǵarýda. Osy toptardyń úılerdi aralaýy nátıjesinde 2500-den astam jumyssyzdar anyqtaldy. Onyń ishinde: Jetibaı – 1071, Munaıshy – 252, Quryq – 744, Bostan – 37, Qulandy – 30, Senek – 66,- dedi Qydyrberdi Bekov.
2022 jyldyń 1 naýryzyna resmı esepke alynǵan jumyssyzdar sany – 1 341 adamdy quraǵan. Jalpy jumyssyzdyq deńgeıi 6,5 paıyzdy quraıdy.
Bıylǵy jyldyń alǵashqy 2 aıynda 239 jańa jumys oryny qurylǵan. Olar, turaqty jumys orny – 100 (Klınfıld Qazaqstan, Rıksos, Quryq port, Janarys, AKTS, órt sóndirý), memlekettik baǵdarlamalar aıasynda qurylǵan jumys orny – 139. Onyń ishinde: qoǵamdyq jumys orny – 101, jastar praktıkasy – 15, áleýmettik jumys oryndary – 23. «Jumys isteımin» baǵdarlamasy aıasynda «Quryq Porty» mekemesine - 16 adam, Port Quryq mekemesiniń kúzet qyzmetine 8 adam ornalasty. Sonymen qatar, 3 adam órt sóndirý bólimine turaqty jumysqa ornalasty.
«9 naýryz kúni «Bos jumys oryndary» jármeńkesi uıymdastyrylyp, jármeńke barysynda «Rıksos» qonaq úıine jumysqa ornalasýǵa 30 adam túıindemesin tapsyrdy. Budan bólek, «Rıksos» qonaq úıinen mamyr aıynan bastap 400-ge jýyq bos jumys ornyna suranys túsip tur.
Sonymen qatar, jyl ishinde «Jumys isteımin» baǵdarlamasy aıasynda kem degende 100-ge jýyq adamdy qamtýdy josparlap otyrmyz. Budan bólek, «MańǵystaýMunaıGaz» ben oǵan servıstik qyzmet kórsetetin kompanııalarda jańa jumys oryndaryn qurý baǵytynda kelissózder júrgizilýde,-dedi spıker.
2022 jyly aýdanda júzege asatyn ınvestıtsııalyq jobalar esebinen 400-den asa jańa jumys orny qurylady dep kútilýde. Atap aıtqanda «KaspııOılGaz» seriktestigi «Rakýshechnyı» ken ornynan mamyr aıynan bastap 100-ge jýyq jańa jumys ornyn qurýdy kózdep otyr.
«SemrýgInvest» seriktestigi Quryq Porty aýmaǵynda astyq termınalynyń qurylys jumystaryna 100-ge jýyq jańa jumys oryndaryn qurýdy josparlap otyr. Joba iske qosylǵanda 40-50 jańa jumys orny qurylady.
Jetibaı aýylynda munaı qaldyqtaryn tazalaý, óńdeý baǵytyndaǵy «Klınfıld Qazaqstan» seriktestiginde 40-qa jýyq turaqty jumys oryny quryldy.
Jetibaı aýylyndaǵy «Janarys» tigin tsehynda 40 jańa jumys orny qurylady. Sonymen qatar, aýdandyq órt sóndirý bóliminde 19 bos jumys orny bar.
