Mańǵystaýdyń ekporttyq áleýeti artyp keledi
AQTAÝ. QazAqparat - Mańǵystaýda aýyl sharýashylyǵy qarqyndy damyp keledi. Mal basy sany 30%-ǵa ósip, 500 myńǵa jetken. Egin sharýashylyǵynda 2 700 mln. teńgege kókónis jáne baqsha daqyldary, mal sharýashylyǵynda 10 800 mln. teńgege et jáne et ónimderi óndirilgen. Oblystyq aýal sharýashylyǵy basqarmasynyń basshysy Serik Qaldyǵul osylaı dep málimdedi.
Ótken jyly óńirde 1030 ga egis alańynyń 790-na tamshylatyp sýarý júıesi qoldanylǵan. Oǵan kókónis jáne baqsha daqyldary egilipti. Osy salada ónim kólemi ótken jylmen salystyrǵanda 10 942,7 tonnadan 15 835,2 tonnaǵa deıin jetip, 44,7% -ǵa ósti.
Mańǵystaýdyń ekporttyq áleýeti de artyp keledi. Máselen, ótken jyly dándi-daqyl jáne un ónimderiniń shyǵarylymy 10,8 mln. AQSh dollaryn qurap, 0,8% -ǵa kóbeıgen. Al, bıyl 12 mln. AQSh dollaryna shetelge shyǵarý josparlanǵan.
Oblystyq aýyl sharýashylyǵy basqarmasynyń basshysy Serik Qaldyǵuldyń aıtýynsha, jalpy quny 1,5 mlrd teńgeni quraıtyn 5 ınvestıtsııalyq joba iske qosylyp, 70-ke jýyq jumys orny ashylǵan.
Sondaı-aq, aýyl sharýashylyǵynda tehnıkalar tolyǵyp keledi. «E-Agroculture» birińǵaı avtomattandyrylǵan basqarý júıesi engizilgen. 2017 jyly 1489 aýyl sharýashylyq jáne arnaıy tehnıkalary tirkelgen. Onyń ishinde 26 tehnıkany jeke kásipkerler óz qarajatyna alypty.
«Aýyl sharýashylyǵynda ásirese, mal basy sany artqany biz úshin jaqsy kórsetkish. Sıyr etin óndirýdi josparǵa saı oryndap otyrmyz. Jospar boıynsha 8 myń tonna edi. Biz 1 myń tonnaǵa artyq oryndadyq, ıaǵnı ósim 25 protsent. Indıkatorlar boıynsha belgilengen josparly mejelerge jetip otyrmyz. Qudyq qazýdy artyq oryndap otyrmyz»,-deıdi oblystyq aýyl sharýashylyǵy basqarmasynyń basshysy.
Sondaı-aq ol Mańǵystaýdaǵy aýyl sharýashylyǵynyń áleýeti jaqsarǵanyn aıtady. Ásirese, basty jetistik aýyl sharýashylyǵy sektorynda 12 mlrd. teńgeden astam ónimniń óndirilip, salanyń naqty kólem ındeksi 108,2%-ǵa jetkeni. Bul kórsetkish respýblıka óńirleri arasynda damý qarqyny boıynsha 1-shi orynǵa shyqqan.
