Mańǵystaýdyń Beıneý aýdanynda bıologııa páni úsh tilde oqytylady
AQTAÝ. QazAqparat - Mańǵystaý oblysynyń Beıneý aýdanyna jumys saparymen barǵan oblys ákimi Eraly Toǵjanov bilim berý nysandaryn, onyń ishinde Beıneý aýylyndaǵy 320 oryndyq «Kúıken» orta mektebine, 80 oryndyq «Bolashaq» balabaqshasyna bardy, - dep habarlady «QazAqparat» HAA tilshisi.
Munda 23 balabaqsha bar. Onda 2441 bala tárbıelenýde. 3-ten 6-ǵa deıingi jastaǵy balalardy bilim jáne tárbıemen qamtý 91,1%-dy quraıdy.
Beıneý jáne Boranqul aýyldarynda 150 oryndyq balabaqsha salýǵa jobalaý-smetalyq qujattary ázirlenýde. Ony memlekettik-jeke áriptestik tetigi boıynsha júzege asyrý qarastyrylýda.
Óńir basshysy Beıneý gımnazııasynyń qyzmetimen tanysty. Pedagogtar 13 «Altyn belgi» ıegeri bar ekenin aıtty.
«Bilim sapasy joǵary deńgeıde. 330 oqýshy 2 aýysymda bilim alady. Túsken kezde emtıhan tapsyrady. Qazir eksperımentaldyq baǵdarlama ázirleýge kirisip jatyrmyz. Bıologııa úsh - qazaq, orys, aǵylshyn tilinde ótedi», - dedi gımnazııa dırektory Bolat Dosanov.
Aýdan boıynsha eki mektepte úsh tildi oqytýǵa kóshý boıynsha pılottyq joba iske asyrylýda. Ótken jyly 102 ustaz jańartylǵan bilim berý mazmuny boıynsha kýrs oqydy. Bıyl 305 pedagog oqytylady. Aýdanda 26 mekteptiń barlyǵy keń jolaqty ınternetpen qamtylǵan.
«Beıneý mektepteri basqa aýdandarǵa sapaly bilim berýdi durys uıymdastyrý jaǵynan úlgi bolýy tıis. Úsh tildilik bilim berýdi engizýdi jalǵastyrý qajet. Fızıka, hımııa kabınetteriniń zerthanalaryna jańa jabdyq ornatyp, mektepterde praktıkalyq sabaqtar ótkizýge arnalǵan shyǵyn smetasyn usynýdy tapsyramyn», - dep atap ótti óńir basshysy.
