Mańǵystaýdyń Beıneý aýdanyna «Spýtnık V» vaktsınasynyń myń danasy jetkizildi
Qazir aýdanda koronavırýsqa qarsy ekpe salý jumystary bastaldy.
Ortalyq aýrýhana bas dárigeriniń orynbasary Elmıra Baıahmetovanyń aıtýynsha, birinshi kezeńde ınfektsııa juqtyrý qaýpi bar toptaǵy medıtsına mamandaryna ekpe salynady.
Alǵashqy kúni ortalyq aýrýhananyń 15 qyzmetkerine vaktsına egildi. Aýdanda kúnine 60 adamǵa deıin ekpe egý josparlanyp otyr.
«Vaktsınatsııa profılaktıkalyq egýge qarsy kórsetkishi joq adamdarǵa ruqsat etiledi. Ekpe alatyn adam birinshi dárigerlik tekseristen ótedi. Ekpe egilgen soń jarty saǵat dárigerdiń baqylaýynda bolady. Aýrýhanada ekpeni salýǵa jáne ony qabyldaǵan adamnyń jaǵdaıyn baqylaýǵa arnalǵan arnaıy kabınet bólingen. Jaýapty dárigerler bekitilgen. Búginde ekpe qabyldaǵandardyń jaǵdaıy qalypty. Keri áseri baıqalǵan joq. Dárigerler 21 kúnnen keıin vaktsınanyn ekinshi dozasyn saldyrady», - dedi ortalyq aýrýhana bas dárigeriniń orynbasary.
Sondaı-aq, medıtsına qyzmetkerlerimen birge «Nur Otan» partııasy Beıneý aýdandyq fılıaly tóraǵasynyń birinshi orynbasary Turaly Jolyshov ekpe saldyrdy.
«Qazir jaǵdaıym jaqsy. Eshqandaı keri áserin baıqaǵanym joq. Dúnıeni dúr silkindirgen qaýipti qaterden qutylýdyń birden bir joly osy vaktsına ekenin túsinemin. Sondyqtan bolashaǵym úshin osy ekpeni aldym. Vaktsınadan qorqýdyń qajeti joq. Kerisinshe, densaýlyq kepili ekenin uǵynýymyz kerek»,- dedi Turaly Jolyshov.
