Mańǵystaýdyń bas sanıtar dárigeri: Turǵyndar arasynda qarym-qatynas azaımaı, aýrý toqtamaıdy
Bul týraly Mańǵystaý oblysynyń Qoǵamdyq kommýnıkatsııa ortalyǵynda ótken brıfıng barysynda Mańǵystaý oblysy sanıtarııalyq-epıdemıologııalyq baqylaý departamentiniń basshysy Ǵazız Nadýev málim etti.
«Búginnen bastap bizdiń Mańǵystaý oblysy indet taralýynyń «sary aımaǵyna» kirdi. Biz ótkende Naýryz merekeleri bastalǵan kezde aıtqan bolatynbyz, saqtyq sharalary saqtalmasa, indettiń taralýy kúsheıe túsýi múmkin dep. Endi mine arada eki apta ótkende osy boljam rastalyp otyr. Turǵyndar eskertýlerge qaramastan Amal merekesi, Naýryz merekesinde bir-birimen tyǵyz aralasty», - dedi ol.
Bas sanıtar dárigerdiń aıtýynsha, búginde oblysta indettiń órshýi baıqalyp otyr. 28-29 naýryzdan bastap Mańǵystaý óńirinde syrqattyń ósim sany anyqtalýda.
«Keshe-búginderi bul sandar - 43 bolyp tirkelýde.Kúnnen-kúnge oblysymyzda aýyrǵandar sany ósip, búgingi tańda sary aımaqqa enip otyrmyz. Osyǵan oraı, ár aımaqqa enýge baılanysty QR Bas Memlekettik sanıtarııalyq dárigerdiń qoly qoıylǵan №67 Qaýlynyń qosymshasynda shekteýlerdiń tártibi bar. Osy shekteýler tártibine saı, biz kezeń-kezeńmen kásipkerlik sýbektileriniń jumysyna shekteý qoıamyz»,- dedi Ǵ. Nadýev.
Ǵazız Nadýevtiń málimetinshe oblys «sary aımaqqa» engenimen ázirge qatań shekteý sharalary engizilmeıdi. Epıdemıologtar bir apta óńirdegi epıdemıologııalyq jaǵdaı baqylaıdy. Eger syrqattanǵandardyń sany azaımaı, ósý qarqyny baıqalatyn bolsa, qatań shekteýlerdi engizýge týra keletinin jasyrmady.
«Búginde oblystyq jedel shtabtyń otyrysynda kún saıyn aımaqtaǵy epıdemıologııalyq jaǵdaı saralanyp, shtab músheleriniń pikirimen jaǵdaıdy retteý jónindegi sharalar qabyldanyp otyr. Halyqtyń arasynda qarym-qatynas azaımaı – bul aýrý toqtamaıdy. Aýa arqyly taraıtyn vırýs bolǵandyqtan, halyq kóp shoǵyrlanǵan jerlerde aýrý juqtyrý qaýpi joǵary ekeni anyq. Turǵyndar arasyndaǵy qarym-qatynasty azaıtpasaq, bul aýrýdy jeńe almaımyz»,-dep atap ótti Ǵazız Nadýev.
