Mańǵystaýdyń Aqshuqyr-2 aýylyna gaz qubyry tartylady

AQTAÝ. QazAqparat – Túpqaraǵan aýdany Aqshuqyr-2 aýylynyń toǵyz júzge jýyq turǵyn úıine gaz qubyry tartylady, dep habarlaıdy QazAqparat tilshisi.

Bul týraly Óńirlik kommýnıkatsııalar alańynda ótken brıfıngte aýdan ákimi Aıdos Hamıev málimdedi.

Jyl sońyna deıin quny 736 mln teńge bolatyn Aqshuqyr-2 aýylynyń 1,2,3,4 oramdaryndaǵy jalpy 898 turǵyn úıdi gazben jabdyqtaý jumystary aıaqtalmaq. Qazir tıisti jumystar bastalǵan.

Sonymen qatar, kóptegen jyldardan beri kóterilip kele jatqan Aqshuqyr aýylyndaǵy Begeı turǵyn úı alabyna gaz tartý jumystary bastalǵan. Begeı turǵyn úı alabynan 100 úıdi jáne Aqshuqyr aýylynyń gaz júıesi joq kóshelerin gazben jabdyqtaý boıynsha 564,8 mln teńge bólinip, jumys bastalǵan.
«Sonymen qatar, Saıyn Shapaǵatov aýylynyń jańa 6 kvartalynda 1312 ýchastokke gazben tartý boıynsha «SMK-4» mekemesimen 2,2 mlrd. teńgege kelisim-shart jasaqtaldy»,-dedi Aıdos Hamıev.
Budan bólek, Túpqaraǵan aýdany turǵyndary tolyǵymen aýyz sýmen qamtamasyz etilgen,-dedi aýdan ákimi. «Nurly jol» baǵdarlamasy boıynsha 1,4 mlrd. teńge nesıe bólinip, Fort-Shevchenko qalasy men Baýtıno aýylyna aýyz sý qubyryn tartý jumystary júrgizile bastaǵan.
Aqshuqyr aýylynan uzyndyǵy 40 shaqyrym, Saıyn Shapaǵatov aýylynan 53 shaqyrym bolatyn aýylishilik sý qubyrynyń qurylysy júrgizilýde. 2 joba boıynsha da merdiger mekeme - «SK TransKomStroı» JShS. Kelisimshart quny - 1,2 mlrd. teńge. 1650 úıdi qamtıtyn jobany bıyl aıaqtap, tapsyrý josparlanyp otyr.
Taýshyq aýylyndaǵy 20,7 shaqyrymdyq aýylishilik sý qubyrynyń qurylysy aıaqtalyp, qoldanysqa berildi.