Mańǵystaýdan alǵash ret «Eýropa-Qytaı» tranzıttik júk poıyzy jóneltildi
Saltanatty rásimge Túrkııanyń kólik jáne ınfraqurylym mınıstri Ádil Qaraısmaıloǵlý men Mańǵystaý oblysy ákiminiń orynbasary Nurlybaı Aqqulov qatysty.
Endi Eýropadan Azııaǵa temirjol arqyly júk tasymaldaýdyń joly ashylyp otyr. Halyq tutynatyn taýarlar bar 42 konteıner tıelgen quramnyń júrý marshrýtynyń jalpy uzaqtyǵy 8693 shaqyrymdy (2 qurlyq, 2 teńiz jáne bes el) quraıdy. Júktiń jalpy júrý ýaqyty - 12 táýlik. Jetkizý orny - Shanhaı qalasy.
Júk poıyzy Ystanbul temirjol stantsııasynan jolǵa shyqty. Jerasty týnneli arqyly Bosfor buǵazyn kesip ótip, Ankaraǵa, budan soń Kars-Tbılısı-Bakýdyń jańa kólik dálizimen poıyz Baký portyna jetti.
12 jeltoqsanda «Beket Ata» Qazteńizkólikfloty fıderlik kemesimen Kaspıı teńizi arqyly júk Aqtaý portyna jetkizildi.
Júk quramy Qazaqstan aýmaǵy boıynsha 3200 shaqyrym temir jolmen júrip ótedi. Budan ári Sıan arqyly Shanhaıǵa jetkizilmek.
Atalmysh sapar Eýropa-Qytaı tranzıttik baǵyty boıynsha Alıat portynan 100% júkpen shyqqan fıderlik keme retinde este qaldy. Bul halyqaralyq kólik dálizin damytýǵa, klıentter men ınvestorlardy tartýǵa, marshrýtqa qatysýshy barlyq elderdiń ınfraqurylymyn jaqsartýǵa oń áserin tıgizedi.
Tasymaldaý operatory - Transkaspıılik halyqaralyq kólik marshrýty boıynsha tasymaldaýdy júzege asyratyn Transkaspıı halyqaralyq kólik konsortsıýmy bolyp tabylady. Al, kólik qatynasynyń teńiz operatory – Qazteńizkólikfloty.
Aıta ketken jón, ótken jyldyń 16 sáýirinde «Aqtaý– Alıat (Baký) – Aqtaý « baǵyty boıynsha konteınerlik fıderlik jeli iske qosylǵan bolatyn. Fıderlik jeli iske qosylǵannan beri 20 000 konteıner tasymaldandy. Al, konteınerlerdiń 70% Aqtaýdan Alıat portyna tasymaldandy. Bul baǵyt Eýropadan Qytaıǵa aparatyn eń qysqa jol bolyp tabylady. Osy jańa kólik baǵyty boıynsha júk tasymaldaryna qatysý Qazaqstan úshin tranzıttik áleýetin arttyrýǵa múmkindik beredi jáne el ekonomıkasynyń damýyna úles qosady.