Mańǵystaýdan 3 kandıdat Senat saılaýyna qatysady

AQTAÝ. QazAqparat - Parlament Senatynyń depýtattary saılaýyna Mańǵystaýdan úsh kandıdat qatysady. Tirkelgen kandıdattardyń ekeýi –memlekettik qyzmetshi, bireýi – kásipker. Úsheýi de Aqtaý qalasynyń turǵyndary, dep habarlaıdy QazAqparat tilshisi.

Olar: Bekbol Tileýmuratuly Orynbasarov, 1971 jyly týǵan. Mańǵystaý oblysy ákiminiń birinshi orynbasary.

Gabbas Shanytbaevıch Dosatov, 1967 jyly týǵan. Mańǵystaý oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy.

Irına Valerıanovna Belıaeva, 1973 jyly týǵan. «Idalgo Aktaý» JShS bas dırektory.

Jalpy Mańǵystaý oblysy boıynsha barlyǵy 7 adamnan ótinish túsken. Onyń ishinde 6 adam ózin ózi usynǵan.

Oblystyq saılaý komıssııasy kandıdattyń oǵan Konstıtýtsııamen jáne osy Konstıtýtsııalyq zańmen qoıylatyn talaptarǵa sáıkestigin belgileý jóninde tıisti suraý salýlar joldaǵan. Nátıjesinde 6 kandıdattyń sáıkestigi rastalyp, 1 kandıdat qoıylatyn talaptarǵa sáıkes kelmeı, alynyp tastalǵan. Taǵy da 3 kandıdat «Qazaqstan Respýblıkasyndaǵy saılaý týraly» Qazaqstan Respýblıkasynyń 1995 jylǵy 28 qyrkúıektegi Konstıtýtsııalyq zańynyń 73-babyna sáıkes tirkeý úshin qajetti qujattardy tolyq usynbaýyna baılanysty tirkeýden bas tartylǵan.

Aıta keteıik, saılaý kúni barlyq deńgeıdegi máslıhat depýtattarynyń birlesken májilisi ótedi. Sodan soń daýys berý bastalmaq.