Mańǵystaýdaǵy jol apaty: Eki kishkentaı qyzǵa qan kerek

AQTAÝ. QazAqparat – Aqtaý-Quryq tasjolyndaǵy apattan aýyr jaraqat alǵan qyzdardyń týystary turǵyndardan qan tapsyrýdy ótinip jatyr, dep habarlaıdy QazAqparat tilshisi.

Mańǵystaý oblystyq densaýlyq saqtaý basqarmasy baspasóz qyzmetiniń habarlaýynsha, 24 shilde kúni saǵat 19.00 shamasynda ortalyq aýrýhananyń qabyldaý bólimine jol apatynan ár túrli jaraqat alǵan er adam, eki qyz jáne qaıtys bolǵan áıel adamnyń denesi jetkizilgen.

6 jáne 10 jasar qyzdar tez arada oblystyq balalar aýrýhanasynyń jansaqtaý bólimine aýystyrylǵan. 2009 jyly týǵan qyz balanyń bas súıegine aýyr zaqym kelgen (1-2 dárejeli shok, oń jaq mı súıeginiń jarylýy). Oǵan neırohırýrgııa bóliminde ota jasalǵan. Dárigerlerdiń aıtýynsha, ota sátti ótkenimen, onyń jaǵdaıy ózgerissiz.

Al er adam oblystyq aýrýhananyń travmatologııa bóliminde jambas súıegi, bas súıegine kelgen jaraqaty boıynsha em alýda. Onyń jaǵdaıy birqalypty.

Qazir aýrýhanadaǵy eki qyzǵa týystary áleýmettik jeli arqyly kómek suraýda. Olar turǵyndardan qan kerek ekenin jarııalaǵan.