Mańǵystaýdaǵy jaǵdaıǵa baılanysty «karteldik kelisim» boıynsha tergeý bastaldy

NUR-SULTAN. QazAqparat – QR Básekelestikti qorǵaý jáne damytý agenttiginiń Otyn-energetıka ónerkásibi departamenti basqarmasynyń basshysy Qýat Asambekov Mańǵystaý oblysyndaǵy jaǵdaıǵa baılanysty «karteldik kelisim» boıynsha tergeý bastalǵanyn aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide QR Básekelestikti qorǵaý jáne damytý agenttiginiń Otyn-energetıka ónerkásibi departamenti basqarmasynyń basshysy Qýat Asambekov suıytylǵan gaz baǵasynyń naryǵynda qalyptasqan jaǵdaıǵa baılanysty birneshe oblysta tergeý bastalǵanyn málim etti.

«Agenttik óz tarapynan osy jaǵdaı boıynsha taldaý jasady. Qazirgi tańda Mańǵystaý oblysynda baǵany kelsý boıynsha, karteldik kelisim boıynsha tergeý bastaldy. Taǵy da basqa Qostanaı men Soltústik Qazaqstan oblystary boıynsha tergeýler júrgizilip jatyr. Tergeý jaqynda bastalǵanyna baılanysty qazir qorytyndy týraly aıtý erte. Birshama ýaqyt kerek bolady», - dedi agenttik ókili.

Eske salsaq, Memleket basshysy Qasym-Jomart Toqaev Twitter-degi suıytylǵan gaz baǵasynan bastalǵan paraqshasynda Jańaózendegi jaǵdaıǵa qatysty jazba jarııalaǵan bolatyn.

«Úkimetke Jańaózendegi jaǵdaıdy ekonomıkalyq turǵydan eskerip, quqyqtyq jaǵynan tez arada qarastyrýdy tapsyrdym. Sherýge shyqqandar qoǵamdyq tártipti buzbaýy tıis. Azamattardyń jergilikti jáne ortalyq bılik organdaryna talabyn ashyq aıtýǵa quqyǵy bar, biraq, bul zańǵa, naqtyraq aıtqanda, beıbit sherýler týraly zańǵa sáıkes júzege asyrylýy kerek», delingen jazbada.

Al QR Premer-Mınıstriniń resmı saıty Mańǵystaý oblysyndaǵy janarmaı stansalarynyń ıeleri suıytylǵan munaı gazynyń qunyn lıtrine 120 teńgeden 85-90 teńgege deıin tómendetý týraly sheshim qabyldaǵanyn jazdy.

Májilis depýtaty Erlan Saırov Úkimet baǵa dálizderin belgileý arqyly baǵanyń uzaq merzimdi turaqtylyǵyn qamtamasyz etetinin aıtyp, halyqty sabyrǵa shaqyrdy.