Mańǵystaýdaǵy Sısem ata qorymynda as beriledi

AQTAÝ. QazAqparat - 13-14 qyrkúıek aralyǵynda «Sısem - eldiń esigi, erdiń besigi» atty jalpyhalyqtyq rýhanı is-sharasy ótip, as beriledi. Sonyń aıasynda qorymnyń mýltımedıalyq kartasy jasalady, dep habarlaıdy QazAqparat tilshisi.

Bul týraly Óńirlik kommýnıkatsııalar qyzmeti alańynda ótken brıfıngte belgili ólketanýshy Alqajan Edilhan aıtty.

«Úsh júz alpys áýlıeli Mańǵystaý atanǵan baǵzy jurt, babatopyraqta kúlli qazaq, ısi musylman álemi úshin qundy sanalatyn qasıetti oryndar az emes. Solardyń biri – Sısem ata qorymy. Bul qorymda tarıhı tulǵalar, el qorǵaǵan batyrlar, bıler men bekter, jomart-myrzalar, rýbasylar men rýhanı kósemderdiń jany baıyz tapqan. Sısem ata týraly tarıhı maǵlumat tym az. Onyń ıslam dinin taratqan qasıet ıesi bolǵany ǵana aıtylady. Sısem ata qorymy – keremet oıýlarymen, tańǵajaıyp epıgrafıkasymen, ár túrli sáýlettik pishindermen erekshelenedi», - deıdi ólketanýshy.

Mańǵystaýlyqtar bul oryndy qazaq halqynyń birneshe qaıratkeri jerlengeni úshin qurmet tutady. Sısem ata qorymy Mańǵystaý aýdanynyń Saıótes eldi mekeninen 35 shaqyrym qashyqtyqta ornalasqan. Ǵylymı tilde panteon (ıgi jaqsylar, jaısańdar, rýbasylar jerlengen oryn) dep ataıdy.
Jergilikti kásipkerlerdiń qoldaýymen, el aǵalarynyń bastamasymen ótetin jalpyhalyqtyq sharada qazaq kúresi, alaman báıge, jazba aqyndar músháırasy, ulttyq sport túrlerinen túrli saıystar joǵary deńgeıde ótedi dep kútilýde.
«Qazirgi ýaqytta Sısem ataǵa arnaıy mýltımedıalyq ınteraktıvti karta jasaqtalyp jatyr, ıaǵnı uıaly telefonmen QR kod arqyly Sısem ata týraly barlyq málimetti kórýge bolady», - deıdi uıymdastyrýshylar.
Rýhanı shara Ótes eldi mekeninen 2 shaqyrym jerde ótedi. Tańdap alynǵan arnaıy oryn kúre joldan 500 metrdeı qashyqtyqta ornalasqan. Asqa 130-ǵa jýyq úı tigilip, 5 myń adam qatysady dep josparlanǵan.
Aıta keteıik, Qazaqstannyń batysynda ornalasqan Sısem ata qorymy respýblıkalyq deńgeıde qorǵaýǵa alynǵan mańyzdy eskertkishter qatarynda.