Mańǵystaýdaǵy shaǵyn qalashyqta kınoteatr ashylady

AQTAÝ. QazAqparat - Túpqaraǵan aýdany Fort-Shevchenko qalasynda kınoteatrdyń qurylysy qarqyndy júrýde, dep habarlaıdy QazAqparat tilshisi.

Qala ortalyǵyndaǵy burynǵy «Jumyspen qamtý ortalyǵy» ǵımaraty ishinen «Jalyn» kınoteatrlar jelisi jaqyn arada halyqtyń ıgiligine beriledi.

Bul oblys kóleminde aýdandar arasynda alǵash ashylatyn kınoteatr bolmaq. Joba memlekettik-jekeshelik áriptestik negizinde júzege asýda. Ol az ýaqyt ishinde tusaýyn kesip, 8 myńǵa jýyq turǵyny bar shaǵyn qalanyń turǵyndaryn qýantpaq jáne jalpy aýdan kórermenderine tartý jasamaq. Kınoteatrda 150-160 oryndyq bolady.

«Qurylys kezinde 10 adam, qurylys bitip, ashylǵan soń 10 adamdy jumyspen qamtý kózdelip otyr. Іshki zalynda metall qurastyrý jumystary bitse, erteń aǵashtarmen qaptaý, qabyrǵalaryn sándeý jumystary júredi. Oryndyqtary sándi, zamanaýı tehnıkalar ornatylady. 16 jeltoqsanda synaqtan ótkizip, jyldyń aıaǵyna deıin bitirýdi josparlap otyrmyz», - dedi aýdan ákimi Aıdos Hamıev.

Nur-Sultan, Almaty, Moskva, tipti Nıý-Iorktyń kınoteatrlarynda kórsetilip jatqan alǵashqy kórsetilimder jiberilmek. Sonymen qatar, qazaq, orys, aǵylshyn tilderinde kıno kórsetý de josparda bar.

Sondaı-aq, bolashaqta kınofestıvalder ótkizip, elimizge tanymal qonaqtardy shaqyrý kózdelip otyr.

Fort-Shevchenko qalasynda buryn 1999 jylǵa deıin «Zarıa» kınoteatry jumys istegen.