Mańǵystaýdaǵy sanıtarlyq jaǵdaı syn kótere me
ASTANA. QazAqparat - Ortalyq kommýnıkatsııalar qyzmeti Mańǵystaý oblystyq fılıaly alańynda óńirlik tutynýshylardyń quqyqtaryn qorǵaý departamentiniń basshysy Maral Qadyrdyń qatysýymen baspasóz máslıhaty ótti, dep habarlady «7292info.kz» portaly.
«Mańǵystaý oblysynda 2016 jyldyń 6 aıynyń qorytyndysy boıynsha epıdemologııalyq jaǵdaı turaqty. Asa qaýipti jáne basqa da karantındik jaǵdaılar tirkelgen joq. Sonymen qatar ish súzegi, paratıf vaktsınamen basqarylatyn: dıfterııa, sirespe, polıomelıt, qyzylsha, qyzamyq, menıngıt, sııaqty aýrýlar oblys aýmaǵynda anyqtalmady. Jedel ishek aýrýlarynyń aýrýshańdyq kórsetkishi 2015 jyldyń salystyrmaly kezeńimen qaraǵanda 19 paıyzǵa tómendedi. Basqa salmonellezdik ınfektsııalar 4 aýrýǵa, taǵamnan ýlaný 3,3 esege, ehınokokoz aýrýy 1,5 esege, pedıkýlez 1,6 esege artyp otyr. Bul ehınokokoz aýrýynyń aldyn alý maqsatynda úı janýarlaryna jáne olardyń ónimderine veterınarlyq qadaǵalaý jumystaryn júrgizý deńgeıi tómendigin kórsetedi. Jalpy juqpaly aýrýlarmen kúreste indetke qarsy sharalardy jandandyra túsý kerek. Qyzmetkerlerdiń sanıtarlyq saýattylyǵy joǵary bolýy tıis»,-deıdi M.Qadyr.
Epıdemologııalyq jaǵdaı boıynsha jedel qolǵa alyp, sheshýin izdestiretin máseleler óte kóp. Aımaǵymyzdyń oba aýrýynyń tabıǵı oshaǵynda, tyrysqaq aýrýy boıynsha, ashyq sý kózi - 1-shi tıpti qaýipti aımaqta ornalasýy, turǵyndar arasynda belsendi mıgratsııanyń birneshe jylǵa sozylýy, óndiristiń kóp salasynda negizgi jumystyń vahtalyq ádispen júrgizilýi Mańǵystaý oblysynyń epıdemologııalyq ereksheligine jatady. Sondyqtan sanıtarlyq-epıdemologııalyq qadaǵalaý salasy mamandarynyń barlyq kezde tııanaqty, erekshe jaýapkershilikpen jumys jasaýy talap etiledi.
Oblys boıynsha aǵymdaǵy jyldyń birinshi jartyjyldyǵynda erekshe tártippen barlyǵy 777 nysanǵa tekseris júrgizý josparlanǵan eken. Búgingi tańda tekserilgen 562 nysannyń 551-i talapqa saı emestigi anyqtalǵan. Ónimderdiń qaýipsizdigi - Keden Odaǵynyń Tehnıkalyq reglamentter talaptaryna sáıkestigin anyqtaý barysynda 712 synama tekserýge alynyp, onyń ishinde 123 synama tehnıkalyq reglamentter talaptaryna sáıkes emes dep tanyldy. Anyqtalǵan sáıkessizdikterdiń nátıjesinde, kásipkerlerge QR-nyń zańnamasyndaǵy talaptardy buzýshylyqty joıý úshin 20 uıǵarym berildi. Uıǵarymdy ýaqytyly jáne durys emes oryndaǵany úshin 2 ákimshilik materıalǵa is qozǵalyp sotqa jiberildi. Sottyń sheshimi boıynsha eki nysanǵa da 100 aılyq eseptik kórsetkish (AEK) kóleminde aıyppul salyndy.Conymen qatar 5 nysan tasymaldaýshylaryna qarama-qarsy tekseris júrgizilip, úsh nysanǵa 20 AEK kóleminde, eki nysanǵa 10 AEK kóleminde aıyppul salyndy.
Jyl basynan beri Mańǵystaý oblysy tutynýshylardyń quqyqtaryn qorǵaý Departamentine, qala jáne aýdan basqarmalaryna jazbasha túrde jáne telefon arqyly barlyǵy 228 aryz-shaǵym kelip túsken. Bólshek saýda nysandary men qoǵamdyq tamaqtaný oryndary, turǵyn úı kommýnaldyq qyzmeti men turmystyq saladaǵy sapasyz qyzmet salasyna kóńili tolmaǵan turǵyndardan 60 aryz joldanǵan. Sonymen qosa, «Jedel jeli» arqyly tutynýshylarǵa 168 keńes berilgen eken.
