Mańǵystaýdaǵy «Ońtústik Qaraturyn» ken ornyndaǵy órt úsh aptadan beri sónbeı jatyr

AQTAÝ. QazAqparat – 9 maýsym kúni Bozashy munaı túbegindegi «Ońtústik Qaraturyn» munaı-gaz ken ornynda tutanǵan órt áli sónbedi. Mamandar úsh aptadan beri qyzyl jalyndy aýyzdyqtaýǵa tyrysyp jatyr, dep habarlaıdy QazAqparat tilshisi.

Mamandar órtti sóndirýge múmkindik beretin uńǵymanyń jobasyn ázirlep jatyr. 1200 metr tereńdikke burǵylaý jumystaryn júrgizýge sheshim qabyldaǵan. Al ken ornynda qyzmet kórsetetin merdiger mekeme qyzmetkerler sanyn qysqartýǵa májbúr. Jumystan shyǵarylǵan 130 azamatty «Bozashy» JShS óz shtatyna qabyldaý týraly sheshim shyǵarǵan.

«Aıdeko-160» burǵylaý stanogyn montajdaý jáne uńǵymany salý úshin jol men alań qurylysy aıaqtaldy. Qazir burǵylaý stanogyn jumyldyrý jumysy júrgizilip jatyr. Jumystyń 45 paıyzy oryndaldy. Aptanyń sońyna deıin aıaqtaýdy josparlap otyrmyz. Bir mezgilde ekinshi stanok úshin ekinshi alańnyń qurylysyn bastaý jáne ázirleý jumystary júrgizilip jatyr», – deıdi «Bozashy munaı» JShS bas dırektorynyń strategııalyq damý jónindegi orynbasary Danııar Dúısembaev.

Esterińizge sala keteıik, órt «Ońtústik Qaraturyn» munaı-gaz ken ornynda 9 maýsym túngi saǵat 03.25-te uńǵymany burǵylaý jumystary kezinde, №303 uńǵymadaǵy burǵylaý quraly kóterilip ketip, jer astynan gaz-sý qospasy atqylaýy sebebinen paıda bolǵan. Bir adam zardap shekti.

13 maýsym saǵat 08:30-daǵy jaǵdaı boıynsha kraterge 302 tekshe metr eritindi tógildi.