Mańǵystaýdaǵy oqıǵadan keıin túrmeler qajetti zamanaýı tehnıkalyq kúzetý quraldarmen jabdyqtalady - Ádilet mınıstrligi
ASTANA. Shildeniń 22-si. QazAqparat /Jasulan Amanbaıuly/ - Ádilet mınıstrligi Mańǵystaý oblysy Aqtaý qalasyndaǵy qatań rejımdi túrmesinde oryn alǵan oqıǵadan keıin, vedomstvoǵa qarasty túrmelerdi qajetti zamanaýı tehnıkalyq kúzetý quraldarmen jabdyqtaýǵa kirispek. Bul týraly búgin brıfıngte Ádilet mınıstrliginiń resmı ókili Erbolat Erimbet málim etti,
dep habarlaıdy QazAqparat.
«Mınıstrdiń bul tapsyrmasyn iske asyrý úshin, qoldanystaǵy túzetý mekemeleriniń materıaldyq-tehnıkalyq jaı-kúıine tolyq tekserý júrgizý tapsyryldy», deıdi E. Erimbet.
Onyń aıtýynsha, osy ispettes oqıǵalardyń qaıtalanbaýy úshin QR keıbir zańdaryna da ózgerister engizý qajet.
«Tyıym salynǵan zattardy Qylmystyq-atqarý júıesiniń mekemelerine alyp ótý, ótkizý faktileriniń jolyn kesý maqsatynda alynǵan aqsha qarajattary men baǵaly zattardy tárkileý, memleket kirisine alý usynysyn zańnamaǵa engizý tapsyrmasy berildi», dep atap kórsetti ol.
Esterińizde bolsa, 2010 jyly maýsymnyń 22-si kúni Aqtaýdaǵy GM 172/1 qatań rejımdegi túrmeden 21 qylmysker qashýǵa áreket jasaǵan bolatyn. Qashqyndardyń 8-i (bireýi tirideı ustalyp, qalǵan jeteýi ólideı) alǵashqy kúni ustalyp, qalǵan 13-i arada tórt kún salyp ustalǵan edi.
