Mańǵystaýdaǵy medıtsınalyq mekemeler 117 qyzmetkermen tolyǵady

AQTAÝ. QazAqparat - Bıyl Mańǵystaýǵa 117 medıtsına qyzmetkeri keledi dep josparlanýda, dep xabarlaıdy QazAqparat tilshisi.

Bul týraly Óńirlik kommýnıkatsııalar qyzmeti alańynda ótken brıfıng barysynda Mańǵystaý oblysynyń densaýlyq saqtaý basqarmasynyń mamandary málimdedi.

2019 jyldyń 6 aı qorytyndysymen emdeý saýyqtyrý mekemeleriniń aqparaty boıynsha Mańǵystaý oblysyna 250-ge jýyq dáriger mamandary qajet. Qalalyq jerge 127 dáriger, aýyldyq jerge 123 dáriger jetispeıdi.

Aýyldyq jerge onyń ishinde:

- Munaıly ortalyq aýdandyq boıynsha – 18;

- Túpqaraǵan ortalyq aýdandyq aýrýhanasy boıynsha – 4;

- Mańǵystaý ortalyq aýdandyq aýrýhanasyna – 2;

- Qaraqııa ortalyq aýdandyq aýrýhanasyna – 7;

- Jetibaı aýyldyq aýrýhanasyna – 9;

- Beıneý ortalyq aýdandyq aýrýhanasyna – 13;

- Boranqul aýyldyq aýrýhanasyna – 1,

- Jańaózen qalasy boıynsha – 69 maman jetispeıdi.

Qazirgi tańda Mańǵystaý óńirine asa qajet mamandar — jalpy tájirıbeli dárigerler, kardıologtar, neırohırýrgtar, akýsher–gınekologtar, anestezıolog-reanımatologtar, neonatologtar, onkologtar, klınıkalyq farmakologtar, ınfektsıonıster, sáýleli dıagnostıkalyq dárigerler, fızıoterapevtter, psıhıatorlar (narkologtar), oftolmologtar, otolarıngologtar.

Osy problemalardy joıý maqsatynda emdeý saýyqtyrý mekeme basshylary 2019 jyly 7 joǵary oqý oryndarynyń bos oryn jármeńkesine baryp, 84 jas mamanmen shart jasasyp keldi.